भांगरभूंय | प्रतिनिधी
पर्यटन मोसम सोंपून लेगीत पर्यटकांची सुमारा भायर गर्दी
भांगरभूंय । प्रतिनिधी
पेडणें: पर्यटन मोसमांत जे पद्दतीन दर्यादेग वाठारांत येरादारी पार्कींगची समस्या आसता तेच पदद्तीन मे म्हयन्याच्या निमाण्या आयतारा लेगीत पार्कींगची समस्या निर्माण जाल्ल्याचें चित्र मोरजी तेमवाडो दर्यादेग वाठारांत दिसलें.
मोरजी तेंबवाडो दर्यादेग वाठारांत फाटल्या आयतारा देशी आनी विदेशी पर्यटकां वांगडा थळावे लोकूय व्हड प्रमाणार आयिल्ले. चडशे सगळेच जाण दर्यादेगेर येतना दुचाकी- चारचाकी गाडयो घेवन येतात. पूण दर्यादेग वाठारांत पार्कींगची कसलीच वेवस्था नाशिल्ल्यान लोकांक खूब त्रास सोंसचो पडटा.
पर्यटक आपल्यो गाडयो घेवन येतात, तेन्ना ते रस्त्याच्या दोनूय वटांनी त्यो पार्क करतात. लोकांच्यो समस्या लक्षांत घेवन पेडणें म्हाल येरादारी पुलीस घडणुकेचे सुवातेर वचून येरादारीचेर तशेंच येरादारी समस्येचेर नियंत्रण दवरपाचो यत्न करतात. नो एण्ट्रीन आयिल्ल्यांचेर तशेंच रस्त्याचे मदीं गाडयो पार्क केल्ल्यांक पुलीस तालांव नेमान दितात. मोरजी पंचायत वाठारांतल्या वेवसायिकांनी आदींच रस्त्याच्या दोनूय वटांनी अतिक्रमण करून अशीर रस्तो आनीक अशीर केला. कांय जाण रस्त्याचेर नो पार्कींग सुवातेर गाडयो दवरतात, ताका लागून येरादारीची कोंयडी जाता. मोरजी पंचायतीन आनी उत्तर गोंय जिल्होधिकाऱ्यांच्या आदेसा प्रमाण नो पार्कींग झोन जाहीर करून थंय तशी सुचोवणी दिवपी तकटे लायल्यात, जुस्त थंयच देशी- विदेशी पर्यटक गाडयो पार्क करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
