भांगरभूंय | प्रतिनिधी
पणजी : शालेय शिक्षण संचालनालयान नव्यो शाळा उगडपाचे सगळे अर्ज भायर मारल्यात. शिक्षण विभागांतल्या सुत्रांनी दिल्ले म्हायती प्रमाण, संभाव्यता अहवालाच्या आधारान विभागान २०२४- २५ ह्या शिक्षणीक वर्सा खातीर सुमार ८१ अर्ज न्हयकारल्यात. सासश्टी म्हालांतल्या फकत दोन शाळांक परवानगी दिल्या.
नव्या शाळांक लागून सध्याच्या संस्थांचेर परिणाम जातलो, अशें सांगून लागसारच्या हेर शाळांनी आक्षेप घेतला. नेमां प्रमाण हेर शाळांच्या १ किलोमीटर भितर नव्या मुळाव्या शाळांक परवानगी ना. जाल्यार माध्यमीक शाळांक तीन किलोमीटरा भितर आनी उच्च माध्यमीक शाळांक आठ किलोमीटर अंतराचेर नव्या शाळांक परवानगी ना. मात फाटल्या कांय वर्सांनी लागीं लागीं शाळा सुरू जाल्ल्यान एकमेकांचे विद्यार्थी आपापल्या शाळांनी व्हरपाची सर्त लागिल्ली पळोवंक मेळटा. ताकाच लागून सरकारान उपरांत हे नेम खरपणान चालीक लायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
