भांगरभूंय | प्रतिनिधी
भावंडांनो,
गुरूविणें रितें जिणें अशें म्हण्टात. गुरूबगर आमी आमचे जिणेंत मुखार वचूंकच शकनात. देखूनच, गुरूची आमचे जिणेंतली सुवात भोव मोलादीक आनी गरजेची आसता. आमी ह्या संवसारांत पावल दवरतना तशेंच ह्या संवसाराची वळख घेतना गुरूच्याच शिकवणेंन, मार्गदर्शनान मुखार वतात. आमचो आई-बाबा म्हळ्यारच आवय-बापूय आमचो पयलो गुरू. घरचीं मनशां हींय आमची गुरूच. घरांत आनी भोवतणच्या संवसारांत कशे तरेन वागचें हें हीच मनशां आमकां शिकयतात. खंयच्याय भुरग्याच्या जिवनात ताचें मनोदय, ताच्यो इत्सा, सपनां पुराय करपी ताच्या आवय-बापाय वांगडा दुसरी व्यक्ती आसता ती म्हळ्यार ताचो गुरू.
भावंडानों, शिकपी भुरग्याक संवसारा खातीर घडोवपी गुरूच आसता. हां, तो फकत आमकां घडयना पूण आमच्यांत खंयचे गुण बरे आसात हाचें भान दिता. आमच्यांतले खाशेले गूण वळखून आपले शक्तीन ते वाडयता. तांची पोसवण करता. आनी आमी मेळयिल्ल्या यशाची, जैताची तोंड भरून तोखणाय करता आनी फुडें वचपाक आमकां उर्बा दिता, प्रेरणा दिता.
संकश्टा वेळार उजू मार्गार चलपाचे बळगें गुरूच्याच शिकवणेन मेळटा. अज्ञानाच्या काळखांत गिन्यानाचो पेट्टो दिवो गुरूच आमच्या मुखार धरता. गुरू म्हळ्यार गिन्यानाचो व्हांवतो झरो. व्हांवत्या झऱ्याचे उदक आनी बागवत, नम्र जायत पियेतात, तितलेच नमळायेन आमी आमच्या गुरूकडल्यान वाचूंक-बरोवंक शिकतात. आमचो गुरू आमची भोवतण पारखूंक समर्थ करता. तांच्याच सांगातान आमची बुद्द सुर्याच्या किरणांनी फुलपी पाकळ्यांवरी फुलून येता.
भावंडानो, गुरू आमचो आदर्श आसता. तांचे कडल्यानूच आमच्या बऱ्या विचारांच्या प्रवाहाक सुरवात जाता. हें आमी केन्नाच विसरूंक फावना. गुरूबगर जें मेळना तें आनीक कोणूच दिवंक शकना.
भावंडानों, हांवें खूब कडेन पळयला. भुरगीं जाण्ट्या-नेणट्यां कडेन कशींय वागतात. अभद्र उलयतात. एकदां तांकां वायट वळण लागलें म्हण्टकच घरच्यांक सोडात, शाळेंत तीं शिक्षकांलागीं लेगीत गैर वागतात, कशींय बेसुमार, बेलगाम वागतात. मागीर फुडारांत तीं कशींय भरकटत वतात. तें पळोवन मनाक खूब्ब दूख जाता.
भावंडानों, आमी कितलींय बुदवंत जांव, गुरूच्या हाताखाला वावुरतना आमची बुदवंतकाय उणीच पडटा. गुरूक लागुनच समाजाकडेन आमची वळख घडटा. जिणेच्या रेंवटांत हांसत्या मुखान मुखार कशें सरचें हें आमचो गुरूच आमकां शिकयता. देखून सांगतां भावंडानों, गुरूचो अपमान जाता अशें केन्नाच वागूं नाकात हां? वागचे ना न्हय? शाब्बास, गुरूचे शिकवणेंन खूब व्हड जायात हां? जातलीं न्हय ? तुमकां यश आंवडेंता. येयात तर…- उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
