भांगरभूंय | प्रतिनिधी
पणजी, बातमीदार ः अंदूं धावेंच्या सगळ्या विशयांत अंतर्गत मूल्यांकन चड कार्यावळी वरवीं ॲक्टिव्हीटी बेस्ड पद्दतीन जातले. हातूंत विद्यार्थ्यांक बरोवपा सयत संशोधन करप, सादरीकरण करप (पीपीटी), श्रव्य-दृश्य माध्यमांचो वापर करप, सूत्रसंचलन करप, मुलाखती घेवप, स्ट्रीट प्ले, ध्वनी चित्रपट तयार करप अश्यो वेगवेगळ्यो गजाली करपाक मेळटल्यो. हाका लागून तांकां अभ्यासा वांगडाच हेर गरजेच्या विशयांत कुशळटाय वाडोवंक मेळटली.
मेळिल्ले म्हायती प्रमाण, मराठी, कोंकणी आनी इंग्लीश भास विशयां खातीर विद्यार्थ्यांच्या वाचन, बरोवपाची कुशळटाय, संवाद कला, सादरीकरण कला आनी आयकुपाची कुशळटाय हांचे आदाराचेर अंतर्गत गूण दितले. हाका लागून विद्यार्थ्याक विशय कितलो बरो समजला आनी ताका विशयांत आवड आसा काय ना हें समजूंक सोंपें जातलें. ॲक्टिव्हीटी बेस्ड शिक्षण पद्दत विद्यार्थ्यांक फकत शाळेंत न्हय तर शाळे भायर कार्यावळी करपाची संद दितली.
कोंकणी विशयांत अंतर्गत मुल्यांकना खातीर वट्ट चार गटांनी उपक्रम दिल्ले आसात. दर एका गटा कडल्यान एक उपक्रम करप गरजेचें आसा. ह्या डिजिटल गटांत 5 ते 7 मिनटांचो ऑडियो व्हिडियो तयार करचो पडटा. हातूंत गोंयांतल्या धर्मीक, सांस्कृतीक, इतिहासीक थळांची म्हायती, सप्तकी बाजार, फेस्त, जात्रा आनी हेर गजालीं विशीं म्हायती व्हिडियो रुपान सादर करची पडटली. सादरीकरण गटांत कविता रचप आनी सादर करप, वक्तृत्व, कथा सांगप अशे उपक्रम आसात.
जाल्यार संघटन पंगडांत नाटक सादरीकरण, परंपरीक खेळ, लोकनाच, स्ट्रीट प्ले, वादविवाद अशें उपक्रम आसात. मराठी विशयांतल्यान अंतर्गत मूल्यांकना खातीर धा उपक्रम दिल्यात. हातूंतले एक वा ताचे परस चड उपक्रम चालीक लावचे पडटले. तातूंत वाचन, बरोवप, कविता गावप, साहित्यीक, शिक्षक वा लोक कलाकार हांची मुलाखत घेवप, शाळेच्या कार्यावळींत सूत्रसंचालन, भाशण दिवप, उपकार मानप, मानेस्तांची वळख करून दिवप, स्ट्रीच प्ले, एकांकी सादर करप, कविता वा मजकूराचेर आदारीत ऑडियो वा पीपीटी तयार करप ह्या उपक्रमांचो आस्पाव आसा.
विद्यार्थ्यांचें तशेंच शिक्षकांचें फायद्याचे
गोंय शालांत शिक्षण मंडळाचे अध्यक्ष भगीरथ शेट्ये हांणी सांगलें, ह्या वर्साचें अंतर्गत मूल्यमापन कृती आदारीत शिकपाचे पद्दती प्रमाण तयार केलां. देखून विद्यार्थ्यांक वेगवेगळे उपक्रम करपाची संद मेळटली. हातूंत विद्यार्थ्यां वांगडा शिक्षकांचो फायदो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
