भांगरभूंय | प्रतिनिधी
फोंडें, प्रतिनिधी ः पंचवाडी अपघात प्रकरणांत फोंडें पुलिसांनी टँकर ड्रायव्हर सुदेश महादेव देसाय (42, देसायवाडो- सांगे) हांचे आड गुन्यांव नोंद करून ताका अटक केली. उपरांत अटक केल्ल्या टँकर चालकाक जामिनाचेर सोडलो. शुक्रारा दनपारां हो अपघात घडलो. ह्या अपघातांत हसन अब्बास शिलेदार (42, आनंदवाडो- सावर्डें) हाका जाग्यारुच मरण आयलें.
चड म्हायती प्रमाण, मापा पंचवाडी उदकाचो टँकर, खडी येरादारी ट्रक आनी कार हांचे मदीं जाल्ल्या अपघातांत हसन शिलेदार हाका मरण आयिल्लें. टँकरांतलो हुसेन भाशा जनतखान (18, कर्नाटक) आनी कारींतली चंद्रावती मोरजकार (70, पेडणें) हीं जखमी जाल्यांत. अपघातांत टँकर रस्त्यार उमथल्ल्यान सावर्डे ते फोंडें मार्गाचेर 3 वरां येरादारी कोंयडी जाल्ली.
मजगतीं, फोंडें पुलिसांनी पंचनामो करुन टँकर ड्रायव्हराचेर गुन्यांव नोंद केलो. उपरांत ताका अटक करुन जामिनाचेर सोडलो. पुलीस निरिक्षक तुषार लोटलीकार फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
