भांगरभूंय | प्रतिनिधी
नवी दिल्ली, खबरां, संस्था ः भारतांत वाडत वचपी अर्थीक असमानतेचेर उपाय म्हणून सरकारान 10 कोटी रुपयां परस चड संपत्ती आशिल्ल्या गिरेस्त लोकांचेर 2 टक्के कर लावचो अशी शिफारस फामाद फ्रेंच अर्थतज्ञ थॉमस पिकेटी हांणी संशोधन पत्रांतल्यान केल्या.
भारतांतल्या असमानतेचेर उपाय काडपा खातीर गिरेस्तांक कर लावपाच्या प्रस्तावाचेर संशोधन पत्रांचे सहलेखन पिकेटी हांणी केला. देशांतली 10 कोटी रुपयां परस चड निव्वळ संपत्ती वर्साक 2 टक्क्यांच्या दरान कर लागू करपाक पात्र थारची. हाचे वांगडाच 10 कोटी रुपयां परस चड मोलाच्या मालमत्तेचेर वारसो कर 33 टक्क्यांनी लावचो अशें उपाय तांणी सुचयला. हाका लागून कर येणावळ वाडटली आनी एकूण देशांतल्या उत्पादनांत (जीडीपी) 2.73 टक्के योगदान मेळटलें. ही कर तरतुद नव्यान चालीक लायल्यार लेगीत देशांतल्या 99.96 टक्के प्रौढ लोकसंख्येचेर व्हडलोसो परिणाम दिसचो ना अशें तांणी संशोधन पत्रांत म्हणलां.
फाटल्या 15 वर्सां सावन भारतात शिक्षणा वयलो सरकारी खर्च जीडीपीच्या तुळेंत 2.9 टक्क्याचेर स्थिर आसा. केंद्राच्या राष्ट्रीय शिक्षण धोरण 2020 खाला थारायिल्ल्या 6 टक्क्यांच्या लक्ष्या परस प्रत्यक्ष खर्च अर्द्या परस उणो आसा. पूण कराच्या रुपांत सरकाराक चड येणावळ मेळ्ळी जाल्यार शिक्षणाचेर खर्च दुपेटीन वाडोवप शक्य जातलें. ह्या नव्या करांच्या प्रस्तावाचेर चड चर्चा जावंक जाय असोय उल्लेख तांणी संशोधन पत्रांत केला.
पेपर पॅरिस स्कूल ऑफ इकोनॉमिक्सचो थॉमस पिकेटी, हार्वर्ड केनेडी स्कूलाचो लुकास चॅन्सेल आनी न्यूयॉर्क विद्यापिठाचो नितीन कुमार भारती हांणी हे संशोधन पत्र बरयला. हे तिनूय अर्थशास्त्रज्ञ ‘वर्ल्ड इक्वॅलिटी लॅब’ कडेन संबंदीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
