पी व्ही सिंधू सेमी फायनलींत

भांगरभूंय | प्रतिनिधी

आदली संवसारीक वस्ताद पी व्ही सिंधून चीनाचे हान यू हिका हारोवन मलेशिया मास्टर्स बॅडमिंटनाच्या बायलांच्या एकोड्या गटाचे सेमी फायनलींत सुवात मेळयली.

हांगाच्या अॅक्सियाटा एरेनांत जाल्ले क्वॉर्टरफायनलींत सिंधून 55 मिनटां मेरेन चलिल्ले मॅचींत चीनाचे खेळगडये आड 21-13, 14-21 आनी 21-12 अशा तीन गेमींनी हारयली.

दुसरी गेम हारून लेगीत पांचव्या सिडा वयले सिंधून निर्णायक गेमींत आपलो संयम राखपाक येस मेळयलें. दोन खेपेची ऑलिम्पीक पदक जैतिवंत सिंधून 16-13 अशी आघाडी घेतल्या उपरांत सेगीत पांच गूण घेवन पयली गेम जिखली. हान यू हिणें दुसरे गेमींत बरी सुरवात केली आनी एका वेळार 15-3 अशी आघाडी घेतली. पूण, सिंधून तिची आघाडी उणी करतना स्कोर 18-13 मेरेन व्हरपाक येस मेळयलें. पूण, हान यू हिणें रोखडेंच कांय गूण मेळोवन दुसरी गेम जिखली. ताका लागून सिंधूक निर्णायक गेमींत खेळचें पडलें.

निमाणे गेमींत सिंधून सुरवाती सावन आपलो शेक दवरतना स्कोर 9-1 असो केलो. तिची ही जबरदस्त सुरवात ही गेम जिखपाक फायद्याची थारली.

सेमी फायनलींत सिंधूची मॅच थायलॅण्डाचे बुसानन ओंगबामरुंगफान आड जातली.

मजगतीं, भारताची आनीक एक खेळगडी अश्मिता चालिहा हिका मात क्वॉर्टरफायनलींत हार घेवची पडली. तिका चीनाचे झांग यी कडल्यान सरळ गेमींनी हार घेवची पडली. संवसारीक क्रमवारींत 53वे सुवातेर आशिल्ले अश्मिताचें 16वे सुवातेर आशिल्ले चीनाचे खेळगडये आड कांय शाणपण चलूंक ना. 30 मिनटां मेरेन चलिल्ले मॅचींत अश्मिताक 21-10 आनी 21-15 अशी हार घेवची पडली.