“च्याये परस किटली गरमूच आनी च्या लेगीत तितलीच…”

भांगरभूंय | प्रतिनिधी

जशें तुमचें मंत्रीपद वता, तशे हे कमांडो आनी पुलीस पांच मिणटां भितर घरा वतले. कोणूच तुमचे वांगडा येवचो ना. मंत्रीपद हें फक्त पांच वर्सां खातीर आसता. हें सगळें दृश्य तात्पुरतें आसा.

हालींच केंद्रीय मंत्री नारायण राणे हांणी गोंयचे मुख्यमंत्री प्रमोदबाब सावंत हांची तांच्या आल्तिन्या वेल्या सरकारी बंगल्यार भेट घेतली. त्या वेळार पत्रकार तांची भायर वाट पळयताले. नारायण राणे गेटींतल्यान भायर सरना फुडें पत्रकारांनी आपले कॅमेरा चालू केले आनी तांकां कांय प्रस्न विचारले. मिनीट भराची ही ’बायट’ सोंपले उपरांत राणे गाडयेंत बसपाक वताले, इतल्यान तांचे कडेन कोण तरी येवन उलोवंक लागलो. हे वटेच्यान पत्रकारांचे कॅमेरा चालूच आशिल्ले तें पळोवन राणेंचे बॉडिगार्ड (पुलीस) पत्रकारांक धांवडावपाक लागले. तांच्या कॅमेराचेर हात घातलो. ‘आमी पत्रकार’ म्हूण ह्या पत्रकारांनी सांगून लेगीत तांचे वांगडा आयिल्ल्या त्या बॉडिगार्डांनी तांकां रेस्पेद दिलो ना. पत्रकारूच न्हय तर खंयच्याच सामान्य मनशा वांगडा लेगीत अशी घडणूक घडूंक जायना. गोंयांत अशे प्रकार खूब फावटी जातात, मात आदले भशेन ताचेर निशेध बी करप जायना. निशेध करता तो पिसो थारूं येता.
अशा वेळार भाजपाचे ज्येश्ठ फुडारी आनी केंद्रीय मंत्री नितीन गडकरी हांच्या ’चहा पेक्षा किटली गरम’ ह्या विधानाची याद येता. पूण नितीन गडकरी आनी कांय वेंचीक राजकारणी सोडले जाल्यार ’च्या आनी किटली’ तितलीच गरम आसता. आदले प्रधानमंत्री अटलबिहारी वाजपेयी, आदली केंद्रीय मंत्री सुष्मा स्वराज, लालकृष्ण अडवाणी, आदले केंद्रीय मंत्री जॉर्ज फेर्नांडीस, आदले खासदार प्रकाश करात हे हुशार आसुनूय सादेपणान जीण जगले आनी लोकांक किकोंत करपाचें राजकारण केन्नाच खेळ्ळे नात. नितीन गडकरी हांच्या सादेपणाक आनी सरळ सत्य उलोवपाचे वृत्तीक लागून घडये लोकांक ते आवडटात.
सात वर्सां आदीं नितीन गडकरी हांणी भाजपाचे सभेंत दिल्लें भाशण अशें आसा: ‘‘हें मंत्रीपद बी फालतू आसता, तातूंत घुस्पून वचूं नाकात. आपले कडेन रस्ते बंद करपाक 25 पुलीस आसात, पूण ते कित्या खातीर? म्हाका कसलोच धोको ना अशें हांव सांगतां. जशें तुमचें मंत्रीपद वता, तशे हे कमांडो आनी पुलीस पांच मिणटां भितर घरा वतले. कोणूच तुमचे वांगडा येवचो ना. मंत्रीपद हें फक्त पांच वर्सां खातीर आसता. हें सगळें दृश्य तात्पुरतें आसा. अर्दे लोक तर पुलिसांनी दिल्ले सलामींतच आसतात. एक मंत्री तर सदांच कागाळी करतालो की रेस्ट हावजाच्यो चादरी बऱ्यो नात म्हूण, आतां ह्या चादरींत कितें आसा? जाय जाल्यार नव्यो घेयात. पीए लेगीत टॅम्पररी आसता. पीए म्हणल्यार ‘चहा पेक्षा किटली गरम’ (लोक मोठ्यान हांसतात).
नांदेडाक गेल्ले कडेन तांच्या पीएन स्टेशन मास्तराक सांगून ट्रेन पयल्या प्लॅटफॉर्मार कशी हाडली हाचेंय उदाहरण ते पीए बाबतींत सांगतना दितात.
नितीन गडकरी हे साद्या सभवाचे, देखून तांकां ‘गरम किटलेची’ हुनसाण आवडली ना. मात अश्योय ‘च्या’आसात ज्यो शिजयले उपरांत सत्तेर आसा मेरेन हुनूच उरतात. गोंयचो एक आदलो मंत्री साईबाबाचें दर्शन घेवंक शिर्डी वचपाक भायर सरलो. तेन्ना तांचे गाडये वयर तांबडो दिवो आसतालो. तांचे बरोबर तेन्नाचे एक आमदारूय गेल्ले. पूण ते आपली स्वताची इनोव्हा घेवन मंत्र्याच्या फाटोफाट वताले. खानापूर पावतकच मंत्री कर्नाटक पुलिसांच्या ‘एस्कोर्टाक’ रावलो आनी ते आयले उपरांतूच मुखार गेलो. अशें तीन- चार कडेन तांकां रावचें पडलें आनी शिर्डी पावपाक 50 किलोमिटराच्या अंतराचेर ते परत रावले आनी पुलीस ‘एस्कोर्टाची’ वाट पळोवंक लागले. खूब वेळ रावून लेगीत ‘एस्कोर्ट’ येना तें पळोवन फाटल्यान आशिल्लो आमदार आपली गाडी स्टार्ट मारून झक्क मारली असली सुविधा म्हणून मुखार गेलो. मंत्र्याचे पयलीं तो शिर्डी पावलो. हो आमदार आयजूय विधानसभेंत आसा. तो मंत्री मात ना. कॅसिनोंच्या खुस्तार पंचांक आनी सरपंचांक दुबय व्हरून हाडपी ह्या राजकारण्याक आयज (….) लेगीत खायना. ताचे बरोबर दुबयची मजा लुटपी व्यक्तीय सांगात दिनात, ते दोमळे जावन नवें गोड सोदीत नव्या मंत्र्या वांगडा भोंवतना दिसतात. अशी हुनसाण आशिल्ली ‘च्या’ थंड जातकच कोणाकूच नाका आसता. ते खातीर नितीन गडकरी सांगता तें स्विकारून राजकारण करूंक जाय. नाजाल्यार फक्त मद मारता.
तरीय बरें सर्वोच्च न्यायालयाच्या आदेशा उपरांत 2017 वर्सा मंत्र्यांच्या गाडयां वयल्यो तांबड्यो लायटी काडल्यो. नाजाल्यार रातच्या वेळार ह्यो लायटी बाकीच्या गाडयांक त्रास करताल्यो. सतत पेटपी ह्यो तांबड्यो लायटी दुसऱ्यांच्या दोळ्यां मुखार काळोख हाडटाल्यो. राजकारणी पणजेच्यान घरा पाव मेरेन त्यो पेटोवन आनी सायरन वाजयत आपलें राजकी अस्तित्व दाखयताले. आपूण कोण तरी वेगळे म्हूण दाखोवपाची वृत्ती अजून राजकारण्यां मदल्यान वचूंक ना. ही तांबडी लायट गेली ताचें दुख्ख तांकां आसतलेंच आनी हे खातीर ‘व्हीआयपी’ संस्कृती मुखार व्हरपाक मंत्री आपले गाडयेच्या मुखारल्या ‘ग्रीला’क तांबड्यो आनी निळ्या रंगाच्यो फ्लॅशलायट लायतात. मंत्र्यांनी लायटी पेटोवन आपूण ‘वेगळो’ म्हूण दाखोवचे परस, सभावान आपली वळख घडोवची. लोकांक किकोंत करचे परस, तांकां आपलेंपण दाखोवचें. सत्ता ही तात्पुरती आसता. मात एक फावट ‘मद’ चडलो म्हणटकच तो देंवपाक कुस्तार. ‘देखूं नाशिल्लें देखतकच’ थोडे ‘मदा’क सांगाती करून घेतात आनी तांचे कुशीक आशिल्लो सारथीय मागीर त्याच वळणाचेर वता. हे खातीरच ‘च्यावूय गरम आनी किटलीय गरम…’
कांय वर्सां आदीं म्हाका साश्टींतल्यान एका आमदाराची ‘किटली’ जावपाची संद मेळ्ळी. ते खातीर सचिवालयांत येवप वचप जातालें. म्हजो पगार, कार्यालया खातीर आशिल्लो भत्तो, आमदाराच्या पेत्रोलाचीं कुपनां आनी सगळें कितें हाडपाक सचिवालयांत वच्चेंच पडटालें. तेन्ना आमदार आनी मंत्र्यांच्यो ‘किटल्यो’ कर्मचाऱ्यां मुखार कश्यो वाजताल्यो त्यो पळयल्यात आनी आयकल्यात. इतलेंच न्हय तर नितीन गडकरी सारके साद्या सभावाचे आमदार विधानसभा अधिवेशनाचे ‘प्रस्न’ बॉक्सांत घालपाक स्वता येतनाय पळयल्यात…

संजय बोरकार
(लेखक आयएएनएस ह्या राष्ट्रीय खबरां संस्थेचे गोंयचे मुखेल प्रतिनिधी आसात)