काणी काणी कोतवा-27
भांगरभूंय | प्रतिनिधी
बांसरीवालो आनी हुंदीर
एक सैमान नटिल्लो सुंदर गांव आशिल्लो. गांवा कुशीक एक न्हंय व्हांवताली. त्या गांवाक पळयल्यार दिसतालें की हो सगळ्यांत सुखी, समाधानी गांव आसतलो म्हणून. मात तशें नाशिल्लें. त्या गांवाचेर एक व्हडलें अपसरण आयिल्लें जें वचपाचें नांवूच घेनाशिल्लें.
त्या गांवांत खूब हुंदीर आशिल्ले. त्या हुंदरांनी अख्खो गांव पोखरून उडयल्लो. तशेंच ते थंय रावपी लोकांकूय सतायताले. घरांनी, दुकानांनी, शेतांनी, पळयता थंय हुंदीरूच हुंदीर! ह्या हुंदरांक लागून जेवणा, खाणाचें बरेंच लुकसाण जातालें. ह्या हुंदरांक कशे सोंपोवप हाचो विचार गांवचे लोक रात आनी दीस करताले. जायते उपाय करून लेगीत गांवांतले हुंदीर सोंपन सोंपनासले. ते आनीक वाडटाले.
ह्या गांवच्या लोकांक हुंदरांनी नाकापुरो केल्ल्याची खबर शेजारच्या गांवांत रावपी एका बांसरीवाल्याक कळटा. तो त्या गांवांत वता आनी गांवच्या लोकांक म्हणटा, ‘‘हांव ह्या हुंदरांक हांगाचे कायमचे सोंपयतां. मात तुमी ताचे बदलाक म्हाका वीस तोळें भांगर दिवचें पडटलें. ’’
सगळे गांवचे लोका एकामेका कडेन चर्चा करतात आनी बांसरीवाल्याक वीस तोळें भांगर दिवपाक तयार जातात. उपरांत तो बांसरीवालो बासरी वाजयत पुराय गांवांत भोंवता. ताच्या बांसरीच्या आवाजान सगळे हुंदीर ताचे कडेन आकर्शीत जातात आनी ताचे फाटल्यान चलपाक लागतात. बांसरी वालो हुंदरांक आपल्या फाटल्यान येता तें पळोवन बांसरी वाजयत न्हंये दिकेन चलपाक लागता. न्हंये म्हर्यांत पावना फुडें तो तसोच न्हंयेंत देंवता. उपरांत हुंदीरूय ताचे फाटल्यान न्हंयेत देंवतात…… आनी उदकांत बुडून मरतात. त्या गांवची समस्या तो बांसरीवालो रोखडोच कायमची सोंपोवन उडयता.
गांवांतले सगळे हुंदीर सोंपोवन बांसरी वालो परत गांवांत परतता. गांवांत येवन तो थारिल्ले प्रमाण लोकांकडेन वीस तोळें भांगर मागता. मात गांवचे लोक ताका भांगर दिना म्हणून सांगतात आनी ताका थंयच्यान धांवडायतात. बांसरीवाल्याक गांवांतल्या लोकांचीं फटींगपणां सोंसना. तो लोकांक सांगता, ‘‘हें तुमी म्हजे वांगडा खूब वायट केलें. तुमकां हाचें फळ भोगचेंच पडटलें.’’ अशें म्हणून तो नेटान बांसरी वाजोवपाक लागता.
ताचे बांसरीच्या तालार त्या गांवचीं सगळीं ल्हान भुरगीं ताचे कडेन आकर्शीत जातात. तीं त्या बांसरीवाल्या फाटल्यान चलपाक लागतात. हें सगळें गांवचे लोक पळयतात आनी बांसरी वाल्याकडेन बांसरी वाजोवपाची बंद करचें म्हणून मागतात. ‘‘ तुमी उपकार करून बांसरी वाजोवपाची बंद करात. आमकां तुमची मागणी मान्य आसा.’’ अशें म्हणून गांवचे लोक बांसरीवाल्याक २० तोळें भांगर काडून दितात. उपरांत बांसरीवालो बांसरी वाजोवपाचे बंद करता आनी भांगर घेवन थंयच्यान वता.
देख: उपकार करप्यांक केन्नाच विसरचें न्हय. ताचे कडेन सदांच कृतज्ञ रावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
