भांगरभूंय | प्रतिनिधी
लखनौ, खबरां संस्था : सोमारा उत्तर प्रदेशांत न्हवऱ्याक व्हंकलेचें चुंबन घेवप बरेंच म्हारग पडलें. दोगांयच्या कुटुंबा मदीं स्टेजीरुच व्हडलीं झगडीं जालीं.
हापूरच्या अशोक नगरांतल्या लग्नाची सुवात झुजाच्या मैदानांत रुपांतरीत जाली. वरमाला (माळ घालप) सुवाळ्या वेळार नव्यान लग्न जाल्ल्या जोडप्यान चुंबन घेतले उपरांत न्हवऱ्याच्या ह्या अतिशाणपणाक लागून बेजार जाल्ल्या व्हंकलेच्या कुटुंबान स्टेजीर येवन न्हवऱ्याच्या सोयऱ्यांक धाडावपाक सुरवात केली. तेय बी दांडे घेवन. व्हंकलेचो बापूय आनी हेर पांच जाण जखमी जाले.
उपरांत पुलिसांक आपयले आनी दोनूय कुटुंबांतल्या सात जाणांक ताब्यांत घेतले. जखमींक थळाव्या हॉस्पिटलांत व्हेले. पुलिसांनी दिल्ले म्हायती प्रमाण, सोमारा रातीं व्हंकलेच्या बापायन आपल्या दोग धुवांच्या लग्नाची वेवस्था केल्ली. पयलें लग्न कसलोच बोवाळ जायनासतना सोंपलें. मात दुसरो सुवाळो वादग्रस्त थारलो.
माचयेर न्हवऱ्यान जबरदस्तीन चुंबन घेतिल्ल्याचो आरोप व्हंकलेच्या कुटुंबान केला जाल्यार वपमाला सुवाळ्या उपरांत व्हंकलेनूच आपलें चुंबन घेवपाचो आग्रो न्हवऱ्या कडेन धरलो अशें न्हवरकार म्हणटात.
हापूरचे वरिश्ठ पुलीस अधिकारी राजकुमार अग्रवाल हांणी सांगलें, आतां मेरेन ह्या प्रकरणांत खंयच्याच कुटुंबा कडल्यान लेखी कागाळ मेळूंक ना. ती मेळ्ळ्या उपरांत कारवाय करतले. भारतीय दंड संहितेच्या कलम 151 खाला भौशीक शांतताय भंग केल्ल्याचो आरोप अटक केल्ल्या स जाणांचेर दवरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
