भांगरभूंय | प्रतिनिधी
मुंबय, खबरां संस्था ः पुण्यांतल्या कल्याणीनगर वाठारांत वेगान वचपी पोर्शे गाडयेन धपको दिवन दोन जाणांक मरण आयलें. ती मोटार चलोवपी तरणाटो नेण्टो आशिल्लो. ताणें रातभर पबांत बसून सोरो पियेल्ल्याचे आतां स्पश्ट जालां. ह्या प्रकरणांत भुरग्याचो बापूय आनी बांदकाम वेवसायीक विशाल अग्रवाल हाका अटक करून 24 मे मेरेन पुलीस बंदखण दिल्या. अटक जावची न्हय हे खातीर विशालान खाशेली येवजण आंखली. पूण, ताका पुलिसांनी कसो धरलो हाची म्हायती आतां उजवाडाक आयल्या.
ह्या प्रकरणांत एफआयआर दाखल जाले बरोबर पुण्याचो हो व्हडलो बिल्डर शार सोडून गेलो. पुलिसांची दिशाभूल करपा खातीर तो पयलीं कार घेवन घरांतल्यान भायर सरलो. उपरांत ड्रायव्हराक कार मुंबय दिशेन व्हरपाक सांगलें. त्याच वेळार ताणें दुसऱ्या ड्रायव्हराक कार गोंयचे वटेन व्हरपाक सांगलें. मागीर ताणें कार पुणे- मुंबय मार्गाचेर सोडली आनी इश्टाची कार घेवन छत्रपती संभाजीनगराक वचपाक भायर सरलो.
पुलिसांक गोंदळांत घालपाक ताणें वेगवेगळ्या मोटारींचो उपेग केलो अशी म्हायती ह्या प्रकरणाची चवकशी करपी पुलीस अधिकाऱ्यांनी दिल्या. इतलेंच न्हय तर पुलिसांनी मोबायल नंबराचेर ट्रॅक करचे न्हय म्हणून नव्या सिम कार्डाचो वापर करपाक सुरवात केल्ल्याचीय म्हायती पुलिसांनी दिली.
आरोपी बिल्डर आपल्या इश्टाची कार वापरता अशी म्हायती पुलिसांक मेळ्ळ्या उपरांत तांणी जीपीएस वरवीं कार ट्रॅक करपाक सुरवात केली. त्या मार्गाचेर आशिल्ल्या सीसीटीव्ही फुटेज तपासून पुणे गुन्यांव फांट्यान सोद लायलो. आनी निमाणे छत्रपती संभाजीनगरांतल्या लॉजाचेर रातीं उसरां धाड घालून ताका अटक केली. अग्रवालाक पुणें सत्र न्यायालयांत हजर केलो. न्यायालयान ताका 24 मे मेरेन पुलीस बंदखण दिल्या.
पुणें पुलिसांनी विशालाक सात दीस रिमांडाचेर दवरपाची मागणी केल्ली. आरोपी छत्रपती संभाजीनगरांत लिपून आशिल्लो. ताणें आनीक कांय पुरावे लिपयल्यात असो दुबाव आसा, नाजाल्यार ताका लिपपाक कारण नाशिल्लें असो युक्तीवाद पुणे पुलिसांच्या वकिलान न्यायालयांत केलो. विशाल अग्रवालाक न्यायालयांत हाडलो तेन्ना ताचेर शाय उडोवपाचो यत्न जालो. पुण्याच्या न्यायालयाच्या भायर उबे आशिल्ल्या नागरिकांनी ह्या प्रसंगाचेर खर निशेध केलो. तांणी पुलिसांच्या व्हॅनाचेर शाय उडयली.
नेण्ट्यां तरणाट्यांचो जामीन रद्द
मजगतीं, पोर्शे गाडी व्हड वेगान चलोवन अपघात जावन दोन जाणांक मरण आयिल्ल्यान नेण्ट्याम आरोपीक बाल हक्क न्यायालयान दणको दिलो. अपघाता उपरांत फकत 15 वरां भितर आरोपीक जामीन मेळ्ळो. पूण बाल हक्क न्यायालयान आतां हो जामीन रद्द केला. नेण्ट्यां आरोपीचो जामीन रद्द केला आनी आतां ताका बालसुधार घरांत धाडपाचे आसा. आरोपी अज्ञान आसा काय सज्ञान आसा हें पुलीस चवकशी उपरांत थारायतलें. बाल हक्क न्यायालयान हो निर्णय दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
