भांगरभूंय | प्रतिनिधी
ग्वाल्हेर, खबरां संस्था : मध्य प्रदेशांतल्या कटनी जिल्ह्यांत 22 खून करपी मोस्ट वाँटेड आरोपी किशोर तिवारी उर्फ किस्सू तिवारी हाका पुलिसांनी अटक केल्या. किस्सू अयोध्येंत रामलल्लाच्या दर्शनाक आयल्लो तेन्ना पुलिसांनी ताका धरलो. हे खातीर उत्तर प्रदेश पुलीस आनी मध्य प्रदेश पुलिसांनी संयुक्त मोहीम सुरु केल्ली.
पुलीस सुत्रांनी दिल्ले म्हायती प्रमाण, किस्सू तिवारीक एका खून प्रकरणांत जामीन मेळिल्लो. बऱ्याच काळा सावन पुलिसांनी ताचो सोद घेवपाक सुरवात केल्ली. पूण दर खेपे तो पुलिसांची दिशाभूल करतालो. ताका धरपा खातीर पुलिसांनी वेगवेगळे यत्न केल्ले. पूण तो मेळनाशिल्लो. निमाणें रामाच्या देवळांत वेश बदलून आयिल्ल्या किस्सूक अटक केल्या.
किस्सूक अटक करपा खातीर पुलिसांनी आपल्या खबऱ्यांक सक्रिय केल्लें. तो अयोध्याच्या राम देवळांत दर्शना खातीर येतलो अशी म्हायती पुलिसांक मेळ्ळी. ते उपरांत सांपळो घालो. तो वेश बदलून म्हळ्यार साधूच्या वेशांत राम मंदिरांत आयलो. त्या वेळार कटनी पुलिसांनी उत्तर प्रदेश पुलिसांच्या मजतीन ताका धरलो. किस्सू हाका आतां कटनी पुलिशेंत हाडला. पुलिसांची दिशीभूल करुन पळून गेले उपरांत किस्सू जयपूर, हरिद्वार, हिमाचल हांगा वचून लिपून रावल्लो. दर खेपे तो पुलिसांक फटोवंक येसस्वी जातालो.
किस्सू तिवारीचेर 22 खुनांचो आरोप आसा. 8 डिसेंबर 2021 सावन ताका अटक करपाचो वॉरंट जारी केल्लो. किस्सूच्या विरोधात कटनींत खून करपाचे 20 गुन्यांव नोंद जाल्यात, जाल्यार इंदूर आनी जबलपूरांत दरेकी एक गुन्यांव नोंद आसात. फाटल्या देड वर्सा सावन ताचो सोद सुरू आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
