भांगरभूंय | प्रतिनिधी
इंदापूर, खबरां संस्था: उजनी धरणांत बोट उमथी जावन जाल्ले घडणुकेंत ६ जाण बुडिल्ले. हातूंतल्या ५ जाणांच्यो कुडी आयज बिरेस्तारा हुबतना नदरेक पडल्यो. तांची वळख पटोवपाचें काम सध्या सुरू आसा. मजगतीं, गौरव डोंगरे हांची कूड आजून सांपडूंक ना. गोकूळ जाधव आनी तांची घरकान्न कोमल आनी तांचीं दोगां भुरगीं आनी एकल्याची कूड सांपडल्या.
इंदापूर- पुणेंचे भीमा न्हंयेंत मंगळारा बोट बुडिल्ल्यान ६ जाण न्हंयेंत बुडिल्ले. एनडीआरएफच्या पंगडान घडणुके सुवातेर वचून बुडिल्ल्यांचो सोद घेतलो. बुधवारा ह्या पंगडाक बुडिल्ली बोट ३५ फूट खोल उदकांत सांपडली. उपरांत बोटीर आशिल्ली मोटरसायकलूय सांपडली.
नेमकें कितें घडिल्लें?
मंगळारा २१ मेक सांजेवेळार करमाळा- सोलापूराच्या झरे गांवांत रावपी गोकुळ ऊर्फ कृष्णा दत्तात्रेय जाधव (३०), ताची घरकान्न कोमल (२५) तांचो पूत समर्थ (देड वर्स), धूव वैभवी (३) हें कुटूंब तशेंच सोलापूरचे सहाय्यक पुलीस निरीक्षक राहुल डोंगरे, करमाळाच्या आदिनाथ सहकारी साकर कारखान्याच्या चेअरमनाचे पूत गौरव धनंजय डोंगरे (२४) आनी बोट चालक अनुराग अवघडे (२६) अशे सात जाण कुगांव हांगच्यान कळाशी वचपाक गेले. प्रवास करीत बोट इतिहासीक इनामदार वाड्याच्या वाठारांत आयली. तेन्ना अचकीर सुटिल्लें वादळ आनी पावसान ही बोट उमथली. भिमा न्हंयेंत बुडिल्ली ही बोट १७ वरांच्या खर यत्नांनी सांपडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
