भांगरभूंय | प्रतिनिधी
उदक पियेतना, न्हातना गरज तितलेंच उदक वापरात. फुकट आनी आयतें मेळटा म्हूण जाय तितलें उदक वापरप चुकीचें.
जिणेंत उदकाक खूब म्हत्व आसा. ताचे बगर जगप शक्य ना. उदक हें धर्तरेचेर आशिल्ली सगल्यांत चड वस्त. पूण तीय सध्या दुर्मीक जायत चल्ल्या. फुडाराक येवपी उदकाचे टंचायेचो विचार करून आमी आतां सावनूच उदकाची राखण करपाक जाय. जमनी वयलो जिवीत जीव उदका बगर जगपाची कल्पनाच करपाक शकना. उदक म्हणल्यार जीवन. उदक ना जाल्यार हें जग पसून उरचें ना.
देवाचें मोलादीक वरदान म्हणल्यार हें उदक. एक दीस उदका पुरवण बंद जाता, तेन्ना मनशाक ताचें म्हत्व कळटा. तरीय आमी मनीसूच दिसाक कितलेंशेंच उदक वाट लायतात. पूण आमच्या देशांतल्या लाखांनी लोकांक आयज पसून पिवपाचें उदक मेळना. तें हाडपाक तांकां फांतोडेर उठून दोन ते तीन किलोमिटर चलत वच्चें पडटा. तांच्या जाग्याचेर तुमी स्वताक दवरून पळयात, म्हणटकच उदकाचो एक थेंब पसून तुमकां म्हत्वाचो दिसतलो.
दरेकल्यान सद्दां इल्लें इल्लें उदक वाटायलें जाल्यार त्या लोकांक पिवपाच्या उदका खातीर अशे हाल काडचे पडचे नात. एकलो उदकाचो इबाड करता म्हूण दुसऱ्याक तें मेळना. तुमच्या आॅफिसांतलीं, घरांतलीं, महिला मंडळांतलीं मनशां हेंच करतात आसतलीं. तांचे कडेन उलयात. उदका विशीं जागृकताय करात. झाडांक उदक घालतना तें फुकट वच्चें ना हाची जतनाय घेयात. गिमाच्या दिसांनी खास करून बांदकामां करूं नाकात. कारण ताका खूब उदक लागता. गाडी सद्दां उठून धुंवू नाकात. ती ओल्या कपड्यान पुसात. भाजी, फळां धुविल्लें उदक फुकट घालोवं नाकात. तें झाडांक रकयात.
पायपां गळटात जाल्यार ताची वेळारुच दुरुस्ती करात. वेळच्या वेळार दुरुस्त केल्यार उदकाची व्हडली बचत जावं शकता. उदक गळटा जाल्यार तें झाडांक वतलें हे खातीर उपाय करात. उदक पियेतना, न्हातना गरज तितलेंच उदक वापरात. फुकट आनी आयतें मेळटा म्हूण जाय तितलें उदक वापरप चुकीचें.
खंयचीय गजाल करतना जर आमी दुसऱ्याचो विचार केलो जाल्यार आमी आमकां फुडारा खातीर तयार करतात, हें कोणे विसरचें न्हय.
– गजानन बा. नायक भाटकार,
आल्त पर्वरी (बार्देश)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
