राजस्थानान ‘विराट’ सपन भंगयलें

भांगरभूंय | प्रतिनिधी

इंडीयन प्रिमीयर लिगेचे (आयपीएल) एलिमिनेटर मॅचींत राजस्थान रॉयल्सान 4 विकेटींनी जैत जोडलें. बंगळुरून जैता खातीर 173 धांवड्यांची मोख दिल्ली. राजस्थानान ती 19 ओव्हरींनी 6 विकेटी व्हगडावन 174 धांवड्यो करून मेळयली.  

हे हारीक लागून बंगळुरूक परतून किताबा पसून पयस उरलो. स्टार बॅट्समनांचें अपेस, बाबत फिल्डींग आनी सरासरीचे बॉलिंगेन बंगळुरूचो घात केलो. राजस्थानान जैत जोडून क्वॉलिफायनर दोनांतली सुवात निश्चीत केली. क्वॉलिफायर दोनांत तो सनरायझर्स हैदराबादा आड खेळटलो. ही मॅच शुक्रारा चेपॉक मैदानाचेर जातली.

मोखीचो फाटलाव करपी राजस्थानाक यशस्वी जयस्वाल आनी टॉम कोहृेर-कॅडमोर (20) हांणी 46 धांवड्यां मेरेन मजल मारून दिली. यशस्वीन 30 बॉलांनी आठ चवक्यांचे मजतीन 45 धांवड्यो केल्यो. कर्म शर्माचे बॉलिंगेचेर संजू सॅमसनाक दिनेश कार्तिकान स्टम्ब बाद केलो.

राजस्थानान 10 ओव्हरींनी 86 धांवड्यांचेर 3 विकेटी व्हगडायिल्ल्यो. 14वे ओव्हरींत विराट कोहलीच्या थ्रोचेर ध्रुव जुरेल (8) धांवबाद जालो. राजस्थानाक 36 बॉलांनी 58 धांवड्यांची गरज आशिल्ली.

रियान पराग आनी शिमरोन हेटमायर हांणी 15वे ओव्हरींत 11 धांवड्यो केल्यो. ते उपरांत रियानान 16वे ओव्हरींत कॅमेरून ग्रीनाची बॉलींग फोडून काडटना 17 धांवड्यो केल्यो. 17 बॉलांनी 16 धांवड्यांची गरज आसतना रियान पराग मोहम्मद सिराजाचे बॉलिंगेचेर बोल्ड जालो. परागान 26 बॉलांनी 36 धांवड्यो केल्यो. अखेरच्या बॉलाचेर फाफ ड्युप्लेसीसान उत्कृश्ट कॅच धरून शिमरोन हेटमायराची खेळी सोंपयली. ताणें 14 बॉलांनी 26 धांवड्यो केल्यो.

12 बॉलांनी 13 धांवड्यांची गरज आशिल्ली आनी रोव्हमन पॉवेल आनी आर आश्विन ही जोडी खेळपट्टीचेर आशिल्ली. फर्ग्युसनाच्या पयल्या दोन बॉलांचेर पॉवेलान दोन चवके मारले आनी सव्या बॉलाचेर सको मारून मॅच सोंपयली. पॉवलान आठ बॉलांनी नाबाद 16 धांवड्यो केल्यो.

ते आदीं रॉयल चॅलेंजर्स बंगळुरूचे सगले स्टार बॅट्समन अपेक्षांच्या वज्या खाला अपेशी थारले. विराट कोहली, रजत पाटीदार आनी महिपाल लोम्रोर हांणी ल्हानल्हान पूण म्हत्वाच्यो धांवड्यो केल्ल्यान रॉयल चॅलेंजर्स बंगळुरूची लज उरली. दिनेश कार्तिकाक नाबाद दिवपाचो वादग्रस्त निर्णयान साबार जाणकारांक अजापभरीत केले. ट्रॅण्ट बोल्टाच्या पयल्या स्पेलांत राजस्थान रॉयल्साक बरी सुरवात करून दिली. ते उपरांत आर आश्विनान आपलो शेक दवरलो. राजस्थानाचे बॉलिंगे मुखार बंगळुरूच्या बॉलरांक चड कांय कितें करपाक जमलें ना.

मुखेली फाफ ड्युप्लेसीस (17) डावाचे पांचवे ओव्हरींत बाद जालो. ट्रॅण्ट बोल्टाच्या बॉलाचेर रोव्हमॅन पॉवेलान ताची कॅच धरली. कोहलीन 24 बॉलांनी तीन चवके आनी एका सक्याचे मजतीन 33 धांवड्यो केल्यो. युजवेंद्र चहलान ताका बाद केलो. बोल्टान पयल्या स्पेलांत तीन ओव्हरींनी स धांवड्यो दिवन 1 विकेट घेतली.

11वे ओव्हरींत रजत पाटीदारान (5) आश्विनाचे बॉलिंगेचेर कॅच दिल्ली. पूण, ध्रुव जुरेलान सोंपी कॅच सोडली. पूण, आश्विनान आपले फुडले ओव्हरींत कॅमेरून ग्रीन (27) आनी ग्लॅन मॅक्सवॅल (0) हांकां सेगीत दोन बॉलांचेर बाद करून बंगळुरूची अवस्था 4 बाद 97 अशी केली. मॅक्सवॅलान संपुर्ण हंगामांत निर्शेणी हाडली. ताणें 11 मॅचींनी खेळटना फकत 58 धांवड्यो केल्यो. आश्विनान चार ओव्हरींनी 19 धांवड्यो दिवन 2 विकेटी घेतल्यो.

पांच धांवड्यांचेर जीवनदान मेळिल्ल्या पाटीदारान चहराचे एके ओव्हरींत 19 धांवड्यो केल्यो. 15वे ओव्हरींत आवेश खानान ताची विकेट घेतली. पाटीदार 22 बॉलांनी दोन चवके आनी दोन सक्यांचे मजतीन 34 धांवड्यो करून कॅच बाद जालो. फुडल्या बॉलाचेर आवेश खानान इनस्विंग बॉलाचेर दिनेश कार्तिकाक एलबीडब्ल्यू बाद केलो. पूण, डीआरएसांत ताका नाबाद दिल्ल्यान वाद जालो. पूण, कार्तिकाक मेळ्ल्या जीवनदानाचो चड फायदो घेवपाक जमलो ना. कार्तिकाक (11) फुडले ओव्हरींत आवेश खानान बाद केलो. तेच ओव्हरींत खेळपट्टीचेर जम बसोवपी महिपाल लोम्रोर बाद जालो. महिपालान दोन चवके आनी दोन सक्यांचे मजतीन 32 धांवड्यो केल्यो. आवेशान 44 धांवड्यो दिवन 3 विकेटी घेतल्यो.

संदीप शर्माचे अखेरचे ओव्हरींत यशस्वी जयस्वाला कडल्यान मिस्ड फिल्ड जाली आनी बंगळुरूक आयत्यो चार धांवड्यो फावो जाल्यो. बंगळुरून 8 विकेटी व्हगडावन 172 धांवड्यो केल्यो.