भांगरभूंय | प्रतिनिधी
लोकांनी उक्तायलें अजाप आनी केलो निशेध
पेडणें: पेडणें पालिकेन मॉन्सुना पयलींचीं कामां हातांत घेतल्यांत. पूण पालिकेन कोट्यांनी रुपया खर्च करून उबारिल्ल्या नव्या इमारती मुखे वेल्या गटाराचेर जाचे वेल्यान लोक वतले, मोटारी वतल्यो, त्या गटाराचेर तुटिल्ल्यो आनी फुटिल्ल्यो पोरण्यो लादयो घालपाचें काम हातांत घेतलां. ताका लागून लोकांनी अजाप उक्तायलां आनी पालिकेच्या काराभारा खातीर निरशेवणी उक्तायल्या.
गटाराचेर घाल्ल्यो ह्यो तुटिल्ल्या लादया वेल्यान नागरीक गटारांत पडपाची शक्यताय आसा. ह्यो तुटिल्ल्यो लादयो घालपाचें काम पेडणें पालिकेचे कर्मचारी आनी तेवूय बायल कर्मचाऱ्यां कडल्यान पालिका मंडळ करून घेता. ताका लागून लोकांनी खर निरशेणी उक्तावन पेडणें पालिकेचो निशेध केला.
पेडणे पालिकेच्या अधिकाऱ्यांनी पालिकेचें गटार नितळ करपा खातीर जे पालिके कडेन खूबशीं वर्सां काम करतात तांकां आदेश काडून हें काम करपाचे निर्देश दिल्यात. ताका लागून कांय कर्मचाऱ्यांनी निरशेवणी उक्तायल्या.
पेडणें पालिकेच्या कारभारा कडेन पालिका मंडळ तशेंच नगराध्यक्ष हांचे लक्ष नाशिल्ल्यान पोरण्यो आनी तुटिल्ल्यो लादयो गटाराचेर घालपाचें काम सुरू आशिल्ल्याचें नागरिकांचें म्हणणें आसा.
मजगतीं, ह्या इमारती मुखा वेल्या गटाराचेर घालपा खातीर नव्यो लादयो अभियंत्यान मागयल्यात. त्यो लादयो अजून मेरेन पाविल्ल्यो नात. आनी पर्यायान आयज (बिरेस्तारा) सप्तकी बाजार हांगा भरता. ताका लागून जर ही गटार वेवस्था उक्ती दवरिल्ली जाल्यार ताचे विपरीत परिणाम वेपाऱ्यांचेर, गिरायकांचेर जावपाचो. म्हणून ज्यो लादयो मागीर त्यो तुटिल्ल्यो आसत जाल्यार त्यो घालपाचो यत्न पालिकेन केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
