भांगरभूंय | प्रतिनिधी
सर्व्हीस रोडा वयले येरादारीक आडखळ
म्हापशें, प्रतिनिधी ः नामोशी गिरीच्या ग्रीनपार्क जंक्शना लागसारा स्लुईस वाल घालपाक १ हजार मि.मी. तांकीच्या उदकाच्या पायपाक बुराक घातलो. तेन्ना उदकाच्या नेटाक लागून त्या पायपांतलें सगळें उदक त्या बुरकांतल्यान भायर व्हांवपाक लागलें आनी सर्व्हीस रोडा वयली येरादारी विस्कळीत जाली. तशेंच हजारांनी लिटर उदकाचो इबाड जालो. ही घडणूक आयज दनपरां १२.३० च्या सुमाराक घडली.
हे विशीं चड म्हायी प्रमाण, ग्रीन पार्क जंक्शनाचेर महामार्गाचें रूंदीकरण केलां. ह्या वेळार जमनी पोंदच्या पायपां वयल्यानूच महामार्गाचें बांदकाम केलें. मात रूंदीकरणा वेळार एमव्हीआर ह्या कंत्राटदारान उदकाच्या पायपांचें स्तलांतरण करूंक ना. ताका लागून ह्या पायपांक आशिल्ली स्लुईस वालूय महामार्गा सकयल गेली आनी आतां ताचो उपेग करप शक्य ना. हाचेर उपाय म्हणून भौशीक बांदकाम खात्याच्या उदका पुरवण विभागान हो २५० एमएम तांकीचो स्लुईस वाल घडणुके सुवातेर उबारपाचो निर्णय घेतलो. तशें कंत्राटदाराक हें काम बुधवारा करपाक लायलें. अशें करपाचें कारण म्हळ्यार बुधवारा अस्नोडें जलशुध्दीकरण प्रकल्प दुरूस्तीच्या कामाक लागून बंद आशिल्लो आनी बार्देस म्हालांत मर्यादीत उदकाची पुरवण केल्ली.
ते प्रमाण कंत्राटदारान ह्या लोखणाच्या पायपाक स्लुईस वाल बसोवपाक लागपी कटरचे मजतीन बुराक मारलो. हो बुराक पडटांच पायपांतल्यान सगळे उदक भायर येवपाक लागलें. सगळें उदक सर्व्हीस रोडाचेर पाविल्ल्यान येरादारीक आडखळ निर्माण जाली. ह्या उदकाच्या फवार्याक बरोच नेट आशिल्लो. सुमार पावणे वरान उदकाचो प्रवाह उणो जातांच येरादारी सुरळीत जाली. तशेंच कंत्राटदारान स्लुईस वाल बसोवपाचें कामूय हातांत घेतलें. तो मेरेन व्हडा प्रमाणांत उदकाचो इबाड जालो.
ह्या पायपांतल्यान पर्वरे, कळंगुटे मतदारसंघां सयत निल्ला, पिळर्णा, रेईश मागूस ह्या वाठारांक उदकाची पुरवण जाता. मात उदकाचो इबाड जाल्ल्यान बुधवार आनी बिरेस्तारा ह्या वाठारांनी उदकाची समस्या निर्माण जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
