भांगरभूंय | प्रतिनिधी
दोंगर कापलो, प्लॉट केले आनी कच्चो रस्तोय बांदून काडलो
वास्को, प्रतिनिधी : कोन्सुआ- कुठ्ठाळेच्या दोंगरकापणेची पळोवणी केल्या उपरांत कुठ्ठाळेचे आमदार आंतोनियो वास हांणी तिडक उक्तायली. हांगा ७८ प्लॉट तयार केल्ल्यान फुडाराक ह्या गांवाचेर बरोच व्हड संकश्ट येतलें. ताका लागून कुठ्ठाळे पंचायतीन संबंदीत प्लॉटधारकांक घरक्रमांक, बांधकाम परवानो तशेंच हेर परवाने दिवचे न्हय असो उलो आमदार वास हांणी मारलो.
हे सुवातेर दोंगर कापणी जाल्ल्याची म्हायती कुठ्ठाळेची सरपंच सानिया परेरा हांणी आमदार वास हांकां दिल्ली. उपरांत हे विशीं रोखडीच दखल घेवन वास हांणी उपजिल्होधिकारी कार्यालय, मुरगांव नियोजन आनी विकास प्राधिकरण, वेर्णे पुलीस स्टेशनाक पत्र धाडलें. उपरांत तांणी सरपंचा सयत ह्या दोंगराची पळोवणी केली. तेन्ना थंयचे दोंगर कापिल्ल्याचें पळोवन तांकां धक्कोच बसलो. थंय प्लॉट करपाचें काम पुराय जालां. थंयचे प्लॉटूय विकल्यात. थंय कच्चो रस्तोय तयार केल्ल्याची म्हायती वास हांणी दिली.
कोन्सुआचो हो गांव फकत ७००- ८०० लोकवस्तीचो आसा. मात फुडाराक प्लॉटां खातीर हांगा लोकवस्ती वाडटली. ताका लागून सगळे गजालींचेर ताण येतलो. थंयचे देंवतेर पावसांत व्हांवपी उदक खंय वतलें, थंयचें घाणयारें उदक आनी हेर गजालीं विशीं प्रस्न निर्माण जातलो. हे विशीं इकराय पंचांनी दखल घेवचे खातीर आमी तांकां प्रती धाडल्यात. थंयच्या घरांक क्रमांक मेळचे न्हय हे खातीर पंच वांगड्यांनी फुडाकार घेवप गरजेचें. ते नवे वस्तीक लागून थळाव्यांक बरेच त्रास सोंसचे पडटले असो भंय तांणी उक्तायलो.
सरपंच सानिया परेरा हांणी ह्या मुखेल रस्त्याक नवो रस्तो जोडटले. देखून हांगा अपघाताचो भाग निर्माण जातलो असो भंय तिणें उक्तायलो. हांगचो दोंगर कांपता हें कळटांच आपणें हाची म्हायती गांवच्या लोकांक आनी चर्चीच्या फादराक दिली. तशेंच हांगचो दोंगर बरोच वेगान कापून जालो. हांगा कच्चो रस्तो तयार करून तो ट्रॅफिकाच्या रस्त्याक जोडला. हे विशीं आमी फुडलीं पावलां उबारतले अशें तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
