भांगरभूंय | प्रतिनिधी
मुरगांव, प्रतिनिधी: वास्को शारांत उदकाचीं पायपां बसोवपाचें काम पुराय जालें तरी रस्त्यांचें डांबरीकरण आजूनय जावंक ना. उदकाचीं पायपां बसोवपी कंत्राटदारांच्या आळशीपणांक लागून वास्को शार स्मार्ट सिटी करपाच्या मार्गार आसा. भौशीक बांदकाम विभाग आनी संबंदीत कंत्राटदाराच्या मनमानी कारभाराक लागून वास्को एफएल गोम्स मार्ग, मुंडवेल ते गोंय शिपयार्ड मार्गाचेर अपघात जावपाची शक्यताय न्हयकारूं येना. मान्सून लागीं पावलो तरी संबंदीत विभाग उदकाचीं पायपां बसयतना खणिल्ल्या रस्त्यांचेर डांबरीकरण करपाक पुरायेन अपेशी थारलां.
वास्को शारा वांगडा मुंडवेल ते गोवा शिपयार्ड मेरेन भौशीक बांदकाम उदक विभागा वरवीं नवीं उदकाचीं पायपां बसयलीं. उदकाचीं पायपां बसयतना सुरवातेक वास्को मुंडवेल ते गोवा शिपयार्ड मार्गा उपरांत वास्को आयओसी ते सेंट ऍण्ड्रयू चर्च मेरेनचो एफएल गोम्स मार्ग खणून उदकाचीं पायपां बसयलीं. उपरांत खणिल्ल्या रस्त्यांचेर मातयेची रास घालून संबंदीत कंत्राटदार म्हयनो जालो तरी गायब जालो. फुडें त्याच कंत्राटदारान वास्को आयओसी ते सेंट ऍण्ड्र्यू चर्च मेरेनचो एफएल गोम्स मार्ग खणलो आनी उदकाचीं पायपां बसोवन परत संबंदी विभाग, कंत्राटदार गायब जाले. ह्या खणिल्ल्या रस्त्त्यांक लागून चलत वची आनी येरादारीक बरेच त्रास सोंसचे पडटात. पावसा पयलीं खणिल्ल्या रस्त्यांचेर डांबर घालूंक ना जाल्यार वास्को शार पणजे शारा वरीं जातलें. आनी हाका पुरायेन जापसालदार भौशीक बांदकाम आनी उदक – रस्तो विभाग, कंत्राटदार आसतले.
बार्देस म्हालांत उदकाचीं पायपां बसोवपी कंत्राटदारान वास्को शाराक पणजी स्मार्ट सिटीचें रूप दिलां. ह्या कंत्राटदाराक कोणूच विचारी नाशिल्ल्यान तांणी आपलीं मस्तेपणां चालूच दवरल्यां. एफएल गोम्स आनी मुंडवेल ते गोंय शिपयार्ड मेरेन उदका खातीर खणिल्ल्या रस्त्यार येवपी सप्तकांत डांबरीकरण जायना जाल्यार पुराय रस्त्यार फोंडकुलां पडटलीं. उपरांत वास्को शार राज्यांत दुसरी स्मार्ट सिटी जावपाक कळाव लागचो ना. ताका लागून बांदकाम रस्ते -उदक विभाग आनी संबंदीत कंत्राटदारान रोखडेंच खणिल्ल्या रस्त्यांचेर हॉटमिक्स डांबरीकरण करप गरजेचें. ना जाल्यार वास्को शाराक स्मार्ट सिटी जावपाक कोणूच आडावपाक शकना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
