भांगरभूंय | प्रतिनिधी
भुवनेश्वर, खबरां संस्था: लोकसभा वेंचणुके खातीर सध्या देशांत प्रचाराचो बोवाळ चलता. देखून राजकी फुडारी एकामेकांचेर आरोप करतना दिसता. ओडिशाचें राजकारण सध्या बरेंच तापलां. कांय दिसां आदीं बीजेडीचे (बिजू जनता दल) चार आमदार भाजपांत आयिल्ले. आतां ओडिशा विधानसभेच्या अध्यक्षाच्या सुचोवण्यां प्रमाण त्या चार आमदारांक कारण दाखोवपाची नोटीस जारी केल्या. तशेंच ते नोटिशेक २७ मे मेरेन जाप दिवपाक सांगलां.
हातूंत ओडिशांतले निमापाड्याचे आमदार समीर दाश, हिंडोलची आमदार सीमराणी नायक, अथमल्लिकाचे आमदार रमेश साई आनी सोरोचे आमदार परशुराम धाडा हांकां ही नोटीस धाडल्या. ह्या चारूय आमदारांक पक्षांतराच्या कारणा वेल्यान अपात्र कित्याक थारावचे न्हय? हाची जाप दिवपा खातीर कारणां दाखयात नोटीस धाडल्या. ताका लागून आतां हे आमदार नोटीशेक कितें जाप दितले हाचे कडेन सगळ्यांचें सध्या लक्ष आसा.
तांकां नोटीस कित्याक धाडिल्ली?
मजगतीं, बीजेडीच्या चारूय आमदारांक पक्षान विधानसभेची तिकेट दिवपाक न्हयकार दिल्लो. ताका लागून ते पक्षाचेर उबगल्ले अशी चर्चा आशिल्ली. उपरांत काय दिसांनी ह्या चारूय आमदारांनी पक्षाचो राजिनामो दिल्लो. उपरांत तांणी भारतीय जनता पक्षांत प्रवेश केल्लो. उपरांत सत्ताधारी पक्षाचे प्रशांत मुदुली हांणी पक्षांतर विरोधी कायद्या खाला तांचें वांगडीपण रद्द करपा खातीर विधानसभेच्या अध्यक्षां कडेन याचिका सादर केल्ल्यो. उपरांत ह्या आमदारांक कारणां दाखयात नोटीस धाडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
