भांगरभूंय | प्रतिनिधी
अमिबाचें नांव ‘नेग्लेरिया फॉवलेरी’: जाणून घेयात म्हायती
कोची, खबरां संस्था : केरळांतले पांच वर्सां पिरायेचे चलयेक ‘मेंदू खावपी अमिबा’क लागून मरण आयलें. हो असो एक अमिबा जो उदकांतल्यान मेंदवांत भितर सरता आनी मेंदवाक लुकसाण करपाक लागता. ह्या अमिबाचें नांव ‘नेग्लेरिया फॉवलेरी’ (Naegleria fowleri). ह्या अमिबाची लागण जाले उपरांत कोझीकोडच्या सरकारी वैजकी म्हाविद्यालय हॉस्पिटलांत चलयेचेर उपचार जाले. मात सोमारा (२० मे) ताका मरण आयलें. ह्या अमिबान हाचे पयलीं जायत्या जाणांक मरण आयलां.
ह्या अमिबाचो संसर्ग कसो जाता, खंय मेळटा आनी संसर्ग जाल्यार ताचीं लक्षणां खंयचीं हाचे विशीं जाणून घेवया.
‘प्रायमरी अमिबीक मेनिंगोएन्सेफलायटीस’ म्हळ्यार कितें?
मेंदू खावपी अमिबा म्हळ्यार नेग्लेरिया फॉवलेरी नांवाच्या अमिबाच्या हल्ल्याक लागून प्रायमरी अमिबीक मेनिंगोएन्सेफलायटिस (Primary amebic meningoencephalitis – PAM) हो संसर्ग जाता. हें मेंदूच्या संसर्गाचें दुर्मीळ दुयेंस. नेग्लेरिया फॉवलेरी हो एक पेशीय सजीव आशिल्ल्यान तो दोळ्यांनी दिसना. सूक्ष्मदर्शका खाला ताचें अस्तित्व दिसपाक शकता. हो अमिबा संवसारभर खंयसरूय तळें, न्हंयो, दर्या, धरणाच्या उदकांत, गरम उदकाचे झरे अश्या गोड उदकांत तशेंच मातयेंतूय सांपडटा. तो शरीरांत फकत नाकांतल्यान प्रवेश करून मेंदवा मेरेन वचपाक शकता. 115°F (46°C) मेरेनचें उच्च तापमान ताची वाड जावपाक पुरो आसता. तो उबेच्या वातावरणांत कांय वेळूच तिगपाक शकता. बुरशे न्हंयेंत वा तळ्याची अवस्था वायट आसल्यार थंय हो अमिबा मेळपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
