भांगरभूंय | प्रतिनिधी
कोरगांव, बातमीदार: गोंय शालांत मंडळान घेतिल्ले धावेचे परिक्षेंत प्रज्ञा हायस्कुलाच्या सामान्य विद्यार्थ्यां वांगडा धावेक शिकपी दिव्यांग विद्यार्थी दक्ष राजेंद्र पोळजी हाणेय परिक्षा दिल्ली. ताणें ८१.६ टक्के गूण मेळोवन विशेश श्रेणींत येस मेळयलें.
प्रज्ञा हायस्कुलाच्या विद्यालयांत सगळ्यां विद्यार्थ्यां वांगडा आपूणय खंयच उणो ना हें दाखोवन दिवन तांणी विद्यालयांत चवथो क्रमांक मेळयलो. दक्ष पोळजीच्या ह्या येसा विशीं मुख्याध्यापिका मिनी पी. एस, शाळेचे चेअरमन नकुल म्हामल, संस्थापक राजू तळवणेंकार, पालक शिक्षक संघाचे अध्यक्ष परशुराम गणपुले, तशेंच ग्रामस्थांनी ताका परबीं भेटोवन ताची तोखणाय केली.
दक्ष हो माईण कोरगांवचो दिव्यांग विद्यार्थी. ल्हानपणा सावन हुशार. आपूण शिकून व्हडलो जातलों हो ध्यास बाळगून आपल्या दुबळेपणाचेर मात करून ताणें हें येस मेळयलें. दक्ष हाचे कमरेच्या भागाक दुबळेंपण आशिल्ल्यान ताका व्हिलचॅरींत विद्यालयांत हाडून पावयतात. ताका हाडपा, व्हरपाचें काम ताचे घरचीं आनी ताचो काका सदांच करतात. दक्ष आपूण सामान्य विद्यार्थ्यां मदीं रोखडोच रमता. शाळेंतल्या विवीध सर्तींनी वांटो घेवन ताणें आतां मेरेन जायतीं इनामांय मेळयल्यांत. एक गुणी विद्यार्थी म्हणूनय तो सगळ्यांचे आवडीचो.
दक्षान विशेश भुरग्यांची शाळा सोडून प्रज्ञा हायस्कुलाची निवड केली. पालकांनी ताका प्रज्ञा हायस्कुलांत धाडलो. शाळेच्या वेवस्थापनान तशेंच मुख्याध्यापिका मिनी पी. एस तशेंच हेर शिक्षकांनी ताका केन्नाच दिव्यांग विद्यार्थी म्हणून पळोवंक ना. ताका हे शाळेंत प्रवेश दिलो आनी शिक्षण दिलें. आयज ह्या विद्यार्थ्यांनी सामान्य विद्यार्थ्यां वरींच आपूण खंयच उणो उरूंक ना हें सिद्ध करून धावेचे परिक्षेक येस मेळयलें. ताचें येस निश्चीत हेर भुरग्यांक प्रेरणा दिवपी थारतलें अशी प्रतिक्रिया ताच्या पालकांनी उक्तायली.
मुख्याध्यापिका मिनी पी एस हांणी दक्षाक परबीं भेटयलीं. दक्ष खूब हुशार. फुडाराक तांणी बरें उच्च शिक्षण घेवन आपले शाळेचें आनी आवय- बापायचें नांव वयर काडचें अश्या उतरांनी तांणी दक्षाची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
