भांगरभूंय | प्रतिनिधी
डेहराडून, खबरां संस्था ः चारधाम यात्रेन उत्तराखंडांतले सगळे विक्रम मोडले. भक्तांची गर्दी पळोवन सरकारान 30 मे मेरेन ऑफलायन नोंदणीचेर पुरायपणान बंदी घाल्या. ऑनलायन नोंदणींत जून उपरांतची तारीख उपलब्ध आसा. सध्या फकत हरिद्वारांत 60 हजारां परस चड भक्त ऑफलायन नोंदणी करपाक रावल्यात, तांकां पुलिस परत धाडपाचो यत्न करतात. हाका लागून जायते फावट पुलिसां कडेन वाद आनी झगडीं जाता.
मंगळारा पुलिसांनी जायत्या भक्तांक परतून धाडले. चारधाम यात्रा खातीर उमेदीन आयिल्ल्या भक्तांक कितल्याश्याच दिसां सावन हरिद्वार वटेन वचूंक वाट मेळूंक नाशिल्ल्यान नागरिकां मदीं निराशा, राग निर्माण जाला. हजारांनी लोक परत आयल्यात आनी हजारांनी लोक हरिद्वारांत रावल्यात.
हरिद्वारांतल्या ऑफलायन नोंदणी केंद्रांत सुमार एक लाख भक्त आसात. केदारनाथांत गौरीकुंड मेरेन मोटारीन चलपी रस्तो आसा, पूण प्रवासी वाहनां फकत सोनप्रयाग मेरेनूच येवंक शकतात. आतां पयलीं परस चड प्रवासी सोनप्रयागाक पावपाक लागल्यात. देखून कांय प्रवासी हॉटेल-धर्मशाळांचो सोद घेवन 5 किमी फुडें गौरीकुंड वतात. देखून सोमार आनी मंगळारा गौरीकुंड आनी सोनप्रयागांत चड भक्त हाजीर आशिल्ले. यात्रा मार्गाचेर भक्तांची येरादारी सुरळीत करपा खातीर यमुनोत्री धामांत सोमारा रातीं उसरां सावन 144 कलम लागू केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
