भांगरभूंय | प्रतिनिधी
मामलेदारान काडिल्ल्या निवाड्यांतल्यान आयलें दिसूनः रामराव वाघ
नेवरा खाजन प्रकरण
पणजीः मानशेक खावटें घालून नेवरा ओ ग्रेडीचें खाजन शेतां खाऱ्या उदकान बुडोवपाच्या प्रकाराचेर तिसावाडी मामलेदारांनी बडी मारल्या. थळावे आमदार विरेश बोरकार हांचो भाव साईश बोरकार जो नेड्डा आनी शिल्पा मानस पळयता. तशेंच सादीक दोड्डामणी जो पुर्सा मानस पळयता हे दोगूय खाजन शेतां बुडोवपाक जापसालदार आसात अशे मामलेदारान काडिल्ल्या निवाड्यांत प्रथमदर्शनी दिसून आयलां, अशें थळावे आनी आम आदमी पक्षाचे फुडारी रामराव वाघ हांणी सांगलें.
मानशेक खावटें घालून नेवराच्या खाजनांत खारें उदक सोडून शेतां पेड्डेर करपाचो यत्न चल्ला अश्यो कितल्योश्योच कागाळी शेतकारां कडल्यान आयिल्ल्यो. ते भायर ह्या मानशींचेर पाळो दवरचो म्हूण मामलेदारान आगशी पुलिसांक सुचोवणी दिल्ली.
आतां हालींच मामलेदारान 16 मेक अंतरीम निवाडो काडून दोग मानशेकार आनी वेवस्थापन समितीक ह्या प्रकाराचेर बोट दवरून सगले मानशेकार आनी समितीच्या वांगड्यांक 30 मेक जावपी निमाणें सुनावणेक हजर रावपाचो आदेश दिला. जर 30 मे पयलीं उदकाचो प्रवाह बंद केलो ना जाल्यार समिती आनी मानशेकार हांकां दोगांकूय दंड दिवपाची शिटकावणी दिल्या. मानशेक जाल्लें
लुकसाण आनी दारा काडून उडोवपाच्या प्रकारा विशीं संघंटणेन पुलिशेंत कागाळ करची अशी सुचोवणी मामलेदारान केल्या, अशी म्हायती रामराव वाघ हांणी दिली.
हे मानशेची पावणी कोणूय घेवपाक शकता. कोणाचेर कसलेंच निर्बंध ना. पूण आमदार विरेश बोरकार हे जापासलदार फुडारी आसात. जो तांच्या कुटुंबांतलो वांगडी हातूंत घुस्पला तांणी चड जापसालदारकी घेवन ह्यो गजाली नियंत्रणांत हाडपाक जाय आशिल्ल्यो. आमदार बोरकार हांचे कडल्यान कारवाय जावप अपेक्षीत आशिल्लें. पूण तांचे कडल्यान कसल्योच हालाचाली जावंक ना. जेन्ना हांवें मामलेदारां कडेन कागाळ केले उपरांत रोखडेच त्याच दिसा विरेश बोरकार हांणी खाजन शेतां विशीं मामलेदारांची भेट घेतली, असो आरोप रामराव वाघ हांणी केलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
