भांगरभूंय | प्रतिनिधी
म्हापशें, प्रतिनिधी ः शिरगांवचे श्रीदेवी लयराई जात्रे निमतान पेटपी होमखणाक लागून प्रदुशण जाता, असो संदर्भ दिवन म्हापशेंचे एक तरणाटेन आक्षेपार्ह पोस्ट सोशल मिडियाचेर घाल्ली. हे विशीं दुबावीत तरणाटेक अटक करची, अशें म्हणीत मंगळारा २१ तारखेक परत देवीचे धोंड आनी भक्तांनी म्हापशें पुलीस स्टेशनाचेर मोर्चो हाडलो. दुबावीत तरणाटेक अटक जावंक ना जाल्यार अस्नोड्यां रस्तो आडावन कायदो हातांत घेतले, अशी शिटकावणी मोर्चो करप्यांनी ह्या वेळार पुलिसांक दिली.
मंगळारा सुमार ११ वरांचेर श्री देवीचे भक्त पुलीस स्टेशनाचेर जमिल्ले. तांकां पुलीस स्टेशनाच्या दारार आडायले. तांतल्या उपेंद्र गांवकार, अमित गांवकार, बाबुसो गांवकार, सोनू गांवकार, गणेश जगन्नाथ गांवकार, भगवान हरमलकार, प्रविण आसोलकार, अॅड. सुधीर साळगांवकार, अॅड. पुष्पराज नावेलकार आनी हेर कांय मेजक्याच लोकांच्या शिश्टमंडळाक भितर सोडले. तांणी पुलीस उपअधीक्षक संदेश चोडणकार आनी निरीक्षक निखील पालेकार हांची भेट घेतली आनी संबंदीत दुबावीत तरणाटेक अटक करपाची मागणी केली.
ह्या वेळार कायदा-सुवेवस्थेचो प्रस्न निर्माण जावचो न्हय म्हणून व्हडा प्रमाणांत पुलिसांची फौज पुलीस स्टेशनाच्या वाठारांत दवरिल्ली. प्रवेश दाराचेर आडयल्ल्या मोर्चेकारांनी नेटान घोशणाय केली.
उपेंद्र गांवकर हांणी सांगलें, तरणाटेन घाल्ल्या पोस्टाक लागून श्री लयराई देवीच्या भक्तांती धर्मीक भावनां दुखवल्यात. खंयचेय परिस्थितींत पुलिसांनी तिका अटक करची, अशी आमची मागणी आसा. हे विशीं दुबाविताक अटक करपा विशीं न्यायालयाक पत्र धाडून परवानगी मागतले अशें पुलिसांनी सांगलां. ते तरणाटेक अटक जायसर आमी कशेच ओगी बसचे नात अशी शिटकावणी तांणी दिली.
मजगतीं फाटल्या मंगळारा १४ मे शेकड्यांनी श्री लयराई देवीच्या भक्तांनी म्हापशें, कोलवाळे आनी दिवचले पुलीस स्टेशनांचेर एकठांय जावन संबंदीत तरणाटेचेर कागाळ दाखल केल्ली. ते प्रमाण म्हापशें पुलिसांनी भा.दं.सं.च्या कलम २९५ (अ) खाला दुबावीत चलयेचेर गुन्यांव नोंद केल्लो.
उपरांत दुबाविताचे आवयन आपली धूव नेण्टी आशिल्ल्याचो दावो करून देवी लयराईच्या भक्तां कडेन चूक मागिल्ली. तशेंच तो पोस्ट हे तरणाटेन सोशल मिडिया वयल्यान डिलीटूय केल्लो.
ती चली नेण्टी न्हय
जे तरणाटेन पोस्ट घाल्लो ती नेण्टी न्हय. तिका एप्रीलांत १८ वर्सां पुराय जाल्यांत. असो दावो लयराई देवीच्या भक्तांनी केला. दुबावितांच्यो धर्मीक भावना दुखवल्यात. तशें आसतना तिका वालंकिणी वचपाक पुलिसांनी परवानगी कशी दिली, असो प्रस्न भक्तांनी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
