अपेशी फिनिशर

भांगरभूंय | प्रतिनिधी

क्रिकेटींत संवसारीक पावंड्यार द ग्रेट फिनिशर म्हूण महेंद्रसिंग धोनीची वळख. मात, चंद्राकूय काळो दाग आसता, तसो दाग धोनीच्या कारकीर्दीचेर आसा. 2019च्या वर्ल्ड कपांत धोनी न्यूझीलँडा आड सेमी फायनलींत धोनी मॅच सोपोवंक शकलो ना. ह्या दुख्खातल्यान भायर सरतना ताणें कांय तेंपान आंतरराष्ट्रीय क्रिकेटींतल्यान निवृत्ती घेतली. आतां आयपीएलाचे निमणे मॅचींत धोनी चेन्नयक मॅच जिखून दिवपाक शकलो ना, तेन्ना तो आयपीएलांतल्यान बॅट्समॅन, विकेट किपर म्हूण निवृत्ती घेवपाक शकतां, अशी चिन्नां दिसपाक लागल्यात.
अंदूंचे आयपीएलांत धोनी बॅट्समॅन म्हूण फुल्ल फॉर्मांत दिसलो. आयपीएल सुरू जावचें पयलीं ताणें कॅप्टनशीपीचो मुकूट ऋतुराज गायकवाडाच्या माथ्यार दवरलो. सुरवातीसावन मेळत तेन्ना बरी बॅटिंग करून ताणें फॅन्सांची मनां-काळजां जिखली.
कॅप्टन ऋतुराज आसलो तरी खरी शीप म्हणल्यार बोट धोनीच चलयतालो हें वेगळें सांगपाची गरज ना. स्वताचो बॅटिंग क्रम धोनीच थारयतलो. 6वे ते 9वे सुवातेमेरेन जाय थंय येवन तो बॅटिंगाचो आनंद घेतालो. चेन्नय प्ले ऑफांत पावतलीच म्हूण सगळ्यांकूच दिसताले. निमण्यो कांय मॅची जावचें पयलीं चेन्नयचें गणीत दिस्त बसताले. मात, निमणें मॅचींत गणीत सामकेंच फेल गेले. कोण चल्लो, कोण फेल जालो हें हांगां म्हत्वाचें उरूंक ना. धोनी क्रिजीर आसतना, 5 बॉलांत 11 धांवड्यो येवंकना धोनी आवट जालो, धोनी मॅच फिनिश करूंक शकना, अशें दिसपाक लागलें.
द ग्रेट फिनिशर धोनीची नाराजी तो आवट जाल्या उपरांत ग्रावंडा वेल्या कॅमेरामॅनान दिस्त कॅमेरांत बंद केली. हातांतली मॅच व्हगडायली, चेन्नयक प्ले ऑफांत व्हरूंक शकना, हाचें दुख्ख धोनीच्या तोंडांर स्पश्ट दिसतालें.
2019चे वर्ल्ड कपांत सेमींत न्यूझीलँडा आड रवींद्र जडेजान हाडाची काडां करून मॅच हाडिल्ली. जाल्यार धोनीन ताका बरी साथ दिल्ली. मात, ऐनवेळार तो रनआवट जालो. चेन्नय मॅचींतूय धोनीन जडेजाक बरी साथ दिल्ली. इतलेंच न्ही तर आक्रमक बॅटिंग करून आरसीबीच्या बॉलरांक घाम काडिल्लो. धोनी मॅच जिखोवन दितलो अशें दिसतनाच निमणें ओरीचे पयल्या बॉलार मारिल्ल्या सिक्सरीन घात केलो. बॉल शेणलो, आनी थंयच धोनीय शेणलो. निमाणें 5 बॉलांत फकत 1 धांव आयलीं.
धोनी आपल्या बॅटिंगेन फॅन्सांचें मनोरंजन करूंक शकता, मात प्रॅशराचे वेळार मॅच जिखून दिवपाक शकना, हें परत एकदा सिद्ध जालें, अशें म्हणूं येता. धोनीन योग्य वेळार आंतरराष्ट्रीय क्रिकेटींतल्यान निवृत्ती घेतली. आयज तो फॉर्मांत आसलो तरी मॅच जिखोवपाक फिनिशिंग टच जाय, नाजाल्यार वेल्या पोजिशनार येवन जाता तितले चड बॉल खेळून मॅच आपल्या टिमी वटेन करपाक जाय. धोनीन दोनूय गजाली करूंक ना. स्वता धोनीक ही गजाल कळ्ळ्या आसतली. ताका लागून तो निमणें खिणाक सामकोच थंड, शांत दिसलो. आयतारची मॅच घडये ताची आयपीएलांतली निमणी मॅच आसतली. परत खेळटना दिसलो जाल्यार वॅटरन्स क्रिकेटींत दिसपाक शकता.