गोंयांक तमनार सारको वीज प्रकल्प गरजेचोः वीज मंत्री ढवळीकार

भांगरभूंय | प्रतिनिधी

पणजी, बातमीदार ः गोंयांत वाडटी वीजेची मागणी पळयल्यार गोंयांक तमनार सारक्या वीज प्रकल्पांची खूब गरज आसा. कर्नाटकान आपल्या प्रदेशा भितर प्रकल्पाक मान्यताय दिवंक ना. खरें जाल्यार सुपें सावन अनमोलांतल्यान फोंडें मेरेन पयलींच एक पोरणी वीज लायन आसा. देखून व्हडलें लुकसाण करिनासतना तमनार लायन कर्नाटकांतल्यानय येवंक शकता हें आमी सर्वोच्च न्यायालयाक दाखयलां. न्यायालयानय तें मान्य केलां. देखून कर्नाटकान हे विशीं सकारात्मक विचार करपाची गरज आसा अशें गोंयचे वीज मंत्री सुदिन ढवळीकार हांणी सांगलें.
आयज पणजेंत जाल्ले पत्रकार परिशदेंत मंत्री ढवळीकार उलयताले. ह्या वेळार खात्याचे मुखेल अभियंते स्टीफन फर्नांडीस आनी अधीक्षक अभियंते मयूर हाजीर आशिल्ले. तमनार प्रकल्पाच्यो मुळाव्यो सुविधा उबारपाचे 90 टक्के काम पुराय जाला. ऑगस्टाच्या निमाणे मेरेन तमनार खातीर गरजेच्यो मुळाव्यो सुविधा दिवपाचो आमी यत्न करतले अशें मंत्री ढवळीकार हांणी हे वेळार सांगलें.
अंदूं राज्यांत वीजेची मागणी 820 मेगावॅट आशिल्ली. फाटल्या कांय वर्सांतली ही सगळ्यांत चड मागणी. फुडल्या कांय वर्सांत वीजेची मागणी आनीक वाडटली. अदमासा प्रमाण फुडल्या तीन ते चार वर्सांत गोंयांत 300 ते 400 मेगावॅट चड वीज जाय पडटली. तमनार गोंयांक 1200 मेगावॅट मेरेन वीज पुरवण करतले. हाकाच लागून हो प्रकल्प गोंयां खातीर गरजेचो आसा. सध्या कर्नाटक सरकारान आपल्या वाठारांत हो प्रकल्प थांबयला. हाचेर हांव कांयच उलोवचो ना. पूण गोंयांतल्या ह्या प्रकल्पाचें इन्फ्रास्ट्रक्चराचे काम ऑगस्टाच्या निमाणे मेरेन पुराय जातलें अशें मंत्री ढवळीकार हांणी सांगलें.
सध्या कोलवाळें ते धारबांदोड्यां 400 केव्हीए लायनी खातीर 7 टॉवर उबारपाचे काम उरलां. धरबांदोडें आनी शेल्डे उपकेंद्रां पुराय जाल्यांत. कुडचडेच्या थळाव्या लोकांच्या देणग्याक लागून हांगा एक टॉवर उबारपाचें काम उरला. हे विशीं बसका घेवन फुडल्या म्हयन्या भितर ती कामां पुराय जातली. कर्नाटकान तमनार प्रकल्प बंद केला तरी गोंयांतल्यो मुळाव्यो सुविधा पुराय जातकच आमी ताचो उपेग हेर कामां खातीर करूं शकता. कोल्हापूरांतल्यान अस्तंत ग्रीडांतल्यान येवपी वीज हे मुळावे बांदावळींतल्यान घेवंक मेळटा अशेंय तांणी सांगलें.