भांगरभूंय | प्रतिनिधी
बायल पुलीस हवालदाराक चाबल्यान नमिता फातर्पेकार आड आनीक एक गुन्यांव नोंद
मडगांव, प्रतिनिधी ः सोशल मिडियाचेर एक बनावट पोस्ट घालून कुंकळ्ळेंतल्या श्री शांतादुर्गा कुंकळ्ळीकान्न देवस्थान समिती आनी महाजन हांचे विशीं श्रेया धारगळकार हिणें आक्षेपार्ह विधानां केल्ली. ह्या प्रकरणांत तिचे आड बेगोबेग कारवाय करची अशी मागणी करपा खातीर 19 मे दिसा कुंकळ्ळेंच्या लोकांनी कुंकळ्ळें पुलीस स्टेशनाचेर मोर्चा काडलो. ह्या वेळार लोकांनी ‘रास्ता रोको’ करुन म्हामार्ग आडायल्लो. देखून म्हामार्ग आडोवन बेकायदेशीर जमाव केल्ल्या प्रकरणांत पुलिसांनी आयज 400 जाणांचेर गुन्यांव नोंद केलो.
कुंकळ्ळेंतल्या श्री शांतादुर्गा कुंकळ्ळीकान्न देवस्थान समिती आनी महाजन हांचे विशीं आक्षेपार्ह विधानां केल्ल्यान श्रेया धारगळकार, नमिता फातर्पेकार आनी अभिषेक नायक हांचे आड कुंकळ्ळें पुलिसांनी गुन्यांव नोंद केला. पूण श्रेया धारगळकार हिका अटक करची म्हणून 19 तारखेक सांजवेळार कुंकळ्ळेंचे लोक व्हड प्रमाणांत पुलीस स्टेशनाचेर जमले. कांय कडेन रस्तो आडावन मोर्चा काडलो. ह्या वेळार बेकायदेशीर जमाव केलो, म्हामार्ग आडायलो हांचे खातीर लोकांक त्रास जालो. देखून पुलिसांनी 400 जाणा आड गुन्यांव नोंद केलो.
नमिता फातर्पेकार आड आनीक एक गुन्यांव
धर्मीक भावना दुखयल्ल्यान कुंकळ्ळे पुलीस नोटीस दिवपा खातीर दुबावीत नमिता हिच्या घरां गेले. त्या वेळार नमितान पुलिसांक आक्षेपार्ह विधानां केल्लीं. तांकां धक्को दिलो. इतलेंच न्हय तर बायल पुलीस हवालदार अश्मिता महाले हिका चाबली. हाची दखल घेवन कुंकळ्ळें पुलिसांनी सरकारी कामात आडखळ हाडिल्ल्यान गुन्यांव नोंद केला. धर्मीक भावना दुखयिल्ल्यान तिका पयलींच चार दिसांची पुलीस कोठडी दिल्या. हाचे भायर पुलीस कर्मचाऱ्यांच्या कामात आडमेळीं हाडून चाबल्या प्रकरण नमिता फातर्पेकार हिचे आड अजून एक गुन्यांव नोंद जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
