भांगरभूंय | प्रतिनिधी
जोयडा, प्रतिनिधी : म्हादय न्हंयेच्या उदका वयल्यान सतावपी कर्नाटक सरकारान आतां विजेच्या प्रस्ना वयल्यान गोंयांक त्रासान घालपाचो कट रचिल्ल्याचें मुखार आयलां. गोंयचे वीज पुरवणेची गरज भागोवपाक ‘गोवा तनमार ट्रान्समिशन प्रोजेक्ट लिमिटेड’ कंपनीन कर्नाटक वन खात्या कडेन परवानगी मागिल्ली. मात सरकारान हो प्रस्ताव भायर मारलो.
हे विशीं चड म्हायती प्रमाण, गोंयांची वीज पुरवणेची गरज भागोवपाक धारवाड जिल्ह्यांतल्या नरेंद्र गांवां पसून गोंयां मेरेन ४०० केव्हीच्या नव्या विजेच्या सरयां खातीर १७७ हॅक्टर म्हळ्यार ४३७ एकर जमीन वापरपाक परवानगी दिवची, असो प्रस्ताव कंपनीन कर्नाटकाच्या अतिरिक्त प्रधान मुखेल वनसंरक्षकां कडेन दिल्लो. ह्या प्रस्तावाचो कर्नाटकाचे अतिरिक्त प्रधान मुख्य वन संरक्षणाधिकारी (पीसीसीएफ), कॅनरा सर्कलचे मुखेल वन संरक्षणाधिकारी (सीसीएफ) हांणी अभ्यास करून सरकाराक अहवाल दिलो. तातूंत कंपनीक परवानगी दिवपाक कांयच हरकत ना अशें स्पश्ट केल्लें. तरी सरकारान हो प्रस्ताव भायर मारिल्लो. इतकेंच न्हय, अशे प्रस्ताव मुळाव्या पांवड्यारूच भायर मारपाची सुचवणी वन खात्याक केली.
कर्नाटकान स्वता पर्यावरणाचो व्हडा प्रमाणांत विधवंस करून आनी गोंयच्या विरोधाक आडनदर करून कळसा-भांडुरा प्रकल्प बळयां चालीक लावन म्हादय न्हंयचें उदक घुंवडायलें. आतां कर्नाटकान गोंयांत आनी वीज पुरवण करपाची गरज भागोवपाक फुडें सरिल्ल्या ‘गोवा तनमार ट्रान्समिशन प्रोजेक्ट लिमिटेड’ कंपनीच्या कामांतूय आडखळ हाडपाक सुरवात केल्ल्याचें स्पश्ट जालां.
तमनारचो वीजमार्ग दांडेली हत्ती कॉरिडोर, जोयडा वाठारांतलो काळी व्याघ्र संरक्षित प्रदेश, खानापूर म्हालांतल्या भिमगड अभयारण्यांतल्यान वता. ताका लागून तनमारान केल्ल्या प्रस्तावाक मंजुरी दिल्यार हांगच्या पर्यावरण आनी रानांची वाट लागतली, अशी कागाळ पर्यावरण मोगींनी कर्नाटकाचे वनमंत्री ईश्वर खंड्रे हांच कडेन केल्ली. पर्यावरण मोगींचें हें ‘नाटक’ खरेंच धरून मंत्री खंड्रे हांणी कंपनीचो प्रस्ताव भायर मारलो.
१६ मार्च २०२४ दिसा कर्नाटकाचे मुखेल सचीव एन. मंजुनाथ प्रसाद हांणी अतिरिक्त प्रधान मुखेल वन संरक्षणाधिकारी (पीसीसीएफ) आनी कॅनरा सर्कल मुख्य वन संरक्षणाधिकारी (सीसीएफ) हांकां पत्र धाडून रान आनी पर्यावरण संरक्षणाचो विचार करून फुडाराक अशे प्रस्ताव मुळाव्या टप्प्यांत न्हयकारचे, अशे आदेश दिल्यात. हाका लागून तमनार प्रकल्पा मुखार कर्नाटकान व्हड आडमेळें हाडिल्ल्याचें स्पश्ट जालां.
मजगतीं, तमनार प्रकल्पा खातीर धारवाड वन विभागांतली ७ हॅक्टर, बेळगांव वन विभागांतली ७० हॅक्टर, हळीयाळ विभागांतली ६८ हॅक्टर आनी दांडेली विभागांतली ३५ हॅक्टर अशी वट्ट १७७ हेक्टर जमीन लागतली. कर्नाटकांत ह्या लायटीच्या मार्गाची लांबी ७७.६४१ किमी आसा. तांतली ३१.८८ किमी रान वाठारांतल्या जाल्यार ६.६१ किमी काळी व्याघ्र वाठारांतल्यान वतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
