फोंडें ड्युटीचेर आशिल्ल्या पीडब्ल्यूडी कर्मचाऱ्याक मारपेट, दुबाविताक अटक
भांगरभूंय | प्रतिनिधी
फोंडें, प्रतिनिधी ः शांतीनगर- फोंडें उदकाच्या टांकये लागसार ड्युटीचेर आशिल्ल्या प्रदीप उर्फ गोविंद विष्णू गांवकार (वाडी – तळावली) ह्या पीडब्ल्यूडीच्या कर्मचाऱ्याक मारपेट केल्ल्यान दुबाविताक अटक करपाची मागणी करीत पीडब्ल्यूडीचे कर्मचारी फोंडें पुलीस स्टेशनाचेर एकठांय जाले. जखमीं गांवकार हांचेर उपाजिल्हो हॉस्पिटलांत उपचार सुरु आसात.
सोमारा सांजवेळा 5 वरांचे सुमाराक हो प्रकार घडलो. फोंडें पुलिसांनी ह्या प्रकरणात दुबावित नागेश जग्गनाथ नायक (49, शांतिनगर- फोंडें) हाका अटक केली.
फाटलीं 22 वर्सां शांतीनगर फोंडेंच्या बांदकाम खात्याच्या टांकयेंतल्यान उदक सोडपी गोविंद गांवकार ह्या कर्मचाऱ्याक नागेश नायक ह्या थळाव्या मनशान मारपेट केली. हे घडणुके उपरांत रातची उसरां फोंडें पुलिशेंत कागाळ केल्ली. पूण तो बांदकाम खात्याचो कर्मचारी आशिल्ल्याचे पुलिसांक सांगूंक ना. आयज सकाळीं बांदकाम खात्याच्या 50 परस चड कर्मचाऱ्यांनी फोंडें पुलीस स्टेशनाचेर एकठांय जावन दुबाविताक अटक करपाची मागणी केली. सहाय्यक अभियंते यशवंत मापारी हांणी रितसर कागाळ दाखल केल्या उपरांत नागेश नायक हाका पुलिसांनी अटक केली.
मजगतीं, बांदकाम खात्याचे सगले कर्मचारी दुबाविताक अटक करपाची मागणी करपा खातीर पुलीस स्टेशनाचेर एकठांय जाल्ल्यान जायत्या सुवातींनी लोकांक उदका पुरवण बंद जाली. ताका लागून लोकांची कांय प्रमाणांत गैरसोय जाली. पूण दुबाविताक अटक जाले उपरांत सगल्या कर्मचाऱ्यांनी कामाच्या सुवातेर वचून उदका पुरवण सुरळीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
