भांगरभूंय | प्रतिनिधी
सांकवाळ सयत हेर सुवातींनी छत्तीसगड पुलिसांची कारवाय: लॅपटॉप, मोबायल सयत 25 लाखांचें सामान जप्त
पणजी, बातमीदार ः सांकवाळ आनी हेर सुवातींनी धाड घालून गोंयांतल्यान महादेव सट्टो ॲप चलोवपी 7 आंतरराज्य बुकींक छत्तीसगड पुलिसांनी अटक करून रॅकेट उक्ताडार हाडला. हे प्रकरणांत छत्तीसगड पुलिसांनी ह्या सात जाणां सयत मुखेल मास्टरमायंडाक अटक केल्या. तांचे कडल्यान 13 लॅपटॉप, 48 मोबायल, 14 चेक बुक, 40 एटीएम कार्ड आनी हेर 25 लाखांचें सामान जप्त केलां. ह्या रॅकेटाची चवकशी जाली तेन्ना तांणी 100 कोटी परस चड अर्थीक वेव्हार केल्ल्याचें स्पश्ट जालें.
मेळिल्ले म्हायती प्रमाण छत्तीसगड पुलिसांच्या कोरबा जिल्ह्यांतल्या कोतवाली पुलिसांनी 11 मे दीसा गुन्यांव नोंद केल्लो. ते प्रमाण कोरबा जिल्ह्याचे अधीक्षक सिद्धार्थ तिवारी, कोतवालीचे पुलीस निरिक्षक मोतीलाल पटेल हांच्या मार्गदर्शना खाला गस्त घालपी सहाय्यक उपनिरिक्षक अजय सिंग, सायबर विभाग अधिकारी गुनाराम सिन्हा, सुशील यादव, चंद्रशेखर पांडे आनी हेरांनी दिल्ले म्हायती प्रमाण संबंदीत वाठारांतल्या घरांचेर धाड घाली. त्या वेळार पंगडान प्रतीक कुमार विधवानी हाका ताब्यांत घेवन ताची चवकशी केली. त्या वेळार पंगडान ताचे कडल्यान दोन मोबायल फोन जप्त केले तेन्ना तो महादेव सट्टो ॲपा वरवीं ऑनलायन सट्टो घेता अशें उक्तें जालें. ते प्रमाण पुलिसांनी ताचेर छत्तीसगड जुगार (प्रतिबंध) कायदो 2022 च्या वेगवेगळ्या कलमा खाला गुन्यांव नोंद करून ताका अटक केली.
अटक केल्ल्या विधवानी हाची फुडली चवकशी केली तेन्ना महादेव पॅनलांत रेडी अंबानी, टाटा लोट्स कंपनींत रिएण्डम डिपॉझिट आनी विड्रोल सिस्टम वरवीं गिरायकांच्या वेगवेगळ्या बँक खात्यांत पयशे हस्तांतरीत करता अशी म्हायती मुखार आयली. ते उपरांत सायबर आनी हेर तज्ञ खात्याच्या आदारान ताणें केल्ल्या 135 बँक खात्यांतल्या वेव्हाराची म्हायती थंयच्या पुलिसांक मेळयली. पुलिसांनी चार बँक खातेंधारकांक अटक केल्या.
मजगतीं, तातूंतले सात जाणांतले दोन गट गोंयांत फ्लॅट भाड्यांन घेवन थंय महादेव सट्टो ॲपा वरवीं आयपीएलांत ऑनलायन सट्टेबाजी करतात अशी म्हायती मेळ्ळी. ते प्रमाण पुलिसांनी सांकवाळांतल्या दोन वेगवेगळ्या इमारतींच्या दोन फ्लॅटांचेर धाड घालून 7 जाणांक अटक केली.
अटक केल्ल्या आंतरराज्य बुकीं मदीं छत्तीसगडांतले 4, महाराष्ट्रांतले 2 आनी हरियाणातल्या एक दुबावीतांचो आस्पाव आसा. तांचे कडल्यान 25 लाखांचें लॅपटॉप आनी हेर सामान जप्त केलां. मजगतीं, ह्या अटक केल्ल्या सात जाणांक छत्तीसगड पुलिसांनी व्हेलां.
दुबावितांनी कमिशनाचेर दिले बँकेचे दस्तावेज
कोरबा सावन अटक केल्ल्या चार जाणांनी कमिशनाचेर बँक खात्याची म्हायती दिली. तशेंच दुबावीत केन्ना केन्नाय खात्यांत जमा केल्ले पयशे रोख म्हणून काडटाले. जाल्यार पंगडातले वांगडी आपल्या बँक खात्यांतल्यान हेर बँक खात्यांत पयशे धाडटाले. ह्या वेव्हाराक लागून वयल्या चार बँक खातेंधारकांकय अटक केल्या.
कोटी रुपयां हस्तांतरीत
135 बँक खात्यांतल्यान सुमार 100 कोटी रुपया हस्तांतरीत जाल्याची म्हायती मुखार आयली. हाचे भायर चार जाणांच्या नांवान खाजगी म्हायती घेवन तांचे वरवीं बँकेचे वेव्हार जातात हेंय उजवाडाक आयलें. सट्टेबाजींच्या वेगवेगळ्या बँक खात्यांत 100 कोटी रुपयां परस चड वेव्हार सांपडल्यात. ह्या प्रकरणाची चवकशी चालू आसा आनी पुलिसांनी वेगवेगळ्या बँकांचे 84 खातें गोठयलां, आनी तातूंत 30 लाख रुपया गोठयल्यांत.
मुखेल मास्टरमायंड आनी चार बँक खातेधारक
सांकवाळांतल्यान अटक केल्ले सट्टेबाज
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
