भांगरभूंय | प्रतिनिधी
सायबर गुन्यांवांचेर नियंत्रण दवरपा खातीर सरकाराचो निर्णय
नवी दिल्ली, खबरां संस्था ः ऑनलायन फटवणूक (Online Fraud) आनी सायबर गुन्यांव (Cyber Crime) हो हुस्क्याचो विशय जाला. आतां केंद्र सरकार तांचे आड कारवाय करतले. देशांत 18 लाखां परस चड दुबावीत सीमकार्डां बंद जातली. ह्या कारवायेत सगळ्यो दूरसंचार कंपन्यो सरकाराक सहकार दिवपाच्यो आसात. अश्या दुबावीत सीमकार्डांचीकेंद्रीय तपास एजन्सीन पयलींच तपासणी केल्या. ह्या सिम कार्डांच्या आदारान जायते तरेचे अर्थीक गुन्यांव जातात अशें दिसून आयलें.
एकाच मोबायल फोनांत हजारांनी सिम कार्डांचो वापर जाता अशें चवकशेंत दिसून आयलें. मोबायल फोन आनी सिम कार्डाच्या आदारान हालींच्या काळांत जायते व्हड अर्थीक गुन्यांव घडल्यात. ऑनलायन फटवणूक वाडत आसा. अशें परिस्थितींत ही कारवाय करप खूब गरजेचें जावन आसा.
2023 वर्सा 10,319 कोटी रुपया मेळ्ळे
नॅशनल सायबर क्रायम रिपोर्टिंग पोर्टल (NCRP) च्या म्हणण्या प्रमाण सायबर गुन्यांवांक बळी पडपी लोकांक 2023 वर्सा सुमार 10,319 कोटी रुपया लुकसाण जाला. 2023 वर्सा अर्थीक गुन्यांवांचे सुमार 6.94 लाख कागाळी नोंद जाल्यात अशें संसदीय समितीन सांगिल्लें.
फाटल्या वर्सा 2 लाख सिम बंद केल्ले
फाटल्या वर्साय दूरसंचार कंपनींनी सायबर गुन्यांवांक संबंदीत 2 लाखां परस चड सिम बंद केल्ले.. हाचे उपरांत हरियाणाच्या मेवात वाठारांत सुमार 37 हजार दुबावीत सिम बंद केल्ले. दुबावीत सीमकार्डांचेर वेळोवेळ कारवाय करपाची सुचोवणी सरकारान दूरसंचार कंपनींक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
