भांगरभूंय | प्रतिनिधी
लंडन, खबरां संस्था ः युरोपीय संघटणेन फेसबूक आनी इंस्टाग्रामाची मेटा ही कंपनी भुरग्यांक ह्या प्लॅटफॉर्माचे वेसनी करतात असो आरोप करुन चवकशी सुरू केल्या. कंपनीच्या प्लॅटफॉर्माचेर भुरग्यांक सुरक्षीत दवरपाक अपेस आयिल्ल्याचो आरोप आसा. दोनूय प्लॅटफॉर्म वापरप्यांक खास करून भुरग्यांक तांकां ताचें वेसन जावचे असो कंटेंट दितात.
नेमकें प्रकरण कितें?
युरोपीय संघटनेच्या म्हणण्या प्रमाण फेसबूक आनी इंस्टाग्राम प्लॅटफॉर्मांचे अल्गोरिदम नेण्ट्यां भुरग्यांच्या असुरक्षीततायेचो फायदो घेवन तांका व्यसनी करतात. हाचे भायर फेसबूक आनी इंस्टाग्राम भुरग्यांक हिंसाचार, द्वेशपूर्ण भाशण आनी लैंगीक अशें कंटेंट दिता.
युरोपीय संघ कसली चवकशी करता?
फेसबूक वा इंस्टाग्राम प्रोफायल तयार करपा खातीर भुरगी पिरायेच्या सत्यापनाचे पालन करता काय ना हाची चवकशी युरोपीय संघ करतले. उपरांत अयोग्य सामुग्री आडावपा खातीर साधनाचो योग्य वापर जाता काय? ते भायर नेण्ट्यां भुरग्यां खातीर तयार जाल्ली डिजिटल सेवा कायदो (डीएसए) नेमांक पाळो दिता कांय ना हांचीय चवकशी करतले.
दोशी थारल्यार कितें?
कंपनी दोशी थारल्यार संवसारीक येणावळीच्या 6% दंड भरचो पडटलो. फाटल्या वर्साच्या आंकडेवारी प्रमाण अदमास केल्यार 83 हजार कोटी रुपया मेळटले. युरोपीय संघ मेटाक आपल्या प्लॅटफॉर्मांत सुदारणा करपाक सक्ती करूंक शकता. जशें हानीकारक कंटेट काडून उडोवन प्लॅटफॉर्म भुरग्यां खातीर सुरक्षीत करचे.
युरोपीय संघटनेच्या आरोपांचेर मेटाची जाप
मेटाच्या मतान हे आरोप निराधार आसात. तांच्या मतान ते भुरग्यांचे सुरक्षे खातीर 50 परस चड साधनां आनी रणनिती तयार करतात. एक दशक सावन प्लॅटफॉर्म सुरक्षीत दवरपाचो यत्न करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
