भांगरभूंय | प्रतिनिधी
सकाळचो घडयाळाचो अलार्म वाजतकच पयलें पावल नकळटां रांदचे कुडांत पडटा. सकाळ फुडें पयलो नग गॅसार शिजता तो च्या. गॅसार दवरिल्लो तोप आनी तातूंन फुलां फुलयत सळसळपी च्या. ल्हवू ल्हवू फुंक मारीत कुलेरान खिरयतना भितर पडिल्ल्यो सुरकुत्यो, तांतुंतलो सपासप सुटपी झुरको आनी तो खमंग वास. च्या जेन्ना गाळणेन गाळीत कपान ओतता तो ओग पळोवन मनाक एक वेगळीच टवटवी येता. च्या चो घोंट घेताच जीव तरतरीत जाता. कांय जाणान कपान तर काय जाणांक सुर्र सुर्र करीत बशेंत च्या पिवपाची संवय. आमी कितलींय ताकतितीके हुनहुनीत च्या पितना जरी जिबेक जळजळ सुटली तरीय च्यावे वयलो मोग उणो जायना. कितेंय जांव च्या पितकच वेगळीच स्फूर्त जाणवता हें तितलेंच खरें.
दिसाची सुरवात च्या बगर जायना. च्या, चाय, टी, छा आदी. च्याक भिन्न नांवां आनी तयार करपाच्यो विवीध पद्दती आसल्यो तरी हें पेय सगळ्यांचेच आवडीचें. फात्यां पारार जांव वा दनपारच्या कडार, जांव शिंयाच्या कडाक्याक वा गरमेच्या रखरखत्या वतार च्याचो घोंट रुच घेत पिवपी असंख्य ‘च्या’हते पळोवपाक मेळटले. सोयरो-धायरो आयल्यार फोर्त च्या दिवन ताका येवकारतात. पोंटभर हासत एकमेकांची हालचाल विचारीत गजाली रंगतात. थकल्यार च्या चो घोंट नव्यान तरतरी हाडटा, चर्चासत्राक बशिल्ल्या दर एकल्याच्या प्रस्नाचेर समाधान सोदपाक च्या चो घोंट उर्जा वाडयता, इश्टांचो पंगड आनी च्या चो वांगड यादींचें मालें विणटां. पड्ट्या पावसार च्या चो सांगांत काय यादी ओल्यो करीत वता तर खबरांपत्र वाचतना च्याचो घोंट जगभरच्या खबरांनी जागृत करता. पुस्तक वाचतना च्या आनी शब्दांचो मेळ जमता, केन्ना- केन्ना तर हातान च्याचो कप घेत विचारमग्न ,सणा- परबांक रातपाळी मारची आसल्यार च्या. जशे च्या बगर जीवित अर्दकुटें.
जेन्ना च्या ची तल्लफ मारता त्या वेळार तो जायच आनी तो वेळ जर सरलो जाल्यार तकली उसळपाक लागता. हें दुखणें फकत एक च्याचो उपासकुच समजूं शकता. हालीं तर इन्टरनेटार पळोवन च्याचे वेगवेगळे प्रयोग आमी करून ताचो आस्वाद घेवपाक लागल्यात. हालीं कांयजाण भलायके बाबतीत सामके सावचीत आशिल्ल्यान काळजी घेत वावुरतात. अदीक काळजी घेत वजन कमी करपाक वा इम्युनिटी वाडोवपाक खाशेली च्या पितात.
च्याचे अनेक प्रकार. जशे हर्बल, काळी, दुदाची, मसाला, अमृतसराचो बदाम पिस्ता च्या, देहरादूनचो बुरंश च्या, पटणा शीर च्या, आसामी च्या, दार्जिलींग च्या, निलगिरीच्या पर्वतरांगेंतलो निलगिरी च्या, काश्मीराक सणापरबांक पारंपारीक पद्धतीन तयार करतात तो कहवा च्या, मातयेच्या आयदनांनी तयार केल्लो च्या, हालीं तर तंदूर च्या चड फामाद. भारतात तशे संवसारातल्या हेर काय देशांनी च्याचें म्हत्व आसा. आमकां जशी लज्जतदार च्या आवडटा, तशेच हेर देशांनी लेगीत च्या क तितलोच मान. श्रीलंकेन सीलोन च्या, रूईबोस च्या हो दक्षीण आफ्रिकेंत रेड बुशा पसून म्हळ्यार तांबड्या झोंपा पसून तयार करतात. ह्या च्या क रेड टी अशें म्हणटात. चीन देशांत बीजिंगांत लोक फुलांची च्या पितात, शांगहाई लोक पांचवी च्या तर दक्षीण चीन फ्यूच्येन प्रांतातले लोक काळे च्याचे शौकीन.
देश- विदेश, गरीब- श्रीमंत, जात पातीचो कसलोच भेदभाव नाशिल्लो हो च्या घरा- घरानीं शिजता. कोणी कितेंय म्हणलें तरी घोंटभर च्या पिले बगर मनाक थाकाय मेळना तशेंच नव्यान सुरवात करपाक झेत मेळना. च्याचे परिणाम वायट तशे बरे. च्यायेची संवय सोपेंपणान सुटना. जेन्ना- जेन्ना कोणीय च्या चेर नियत्रंण दवरपाचें व्रत घेता तेन्ना ताची काकुळट दिसताच आनी जाणे हें व्रत मोडीत घोंटभरुच पिता रोखडीच संवय मोडप कठीण म्हणलें तांची मात तोखणाय दिसता. सुस्त बसून जेन्ना मनसोक्त च्या पिता तेन्ना म्हाका ह्या च्याचो उपास करप्यांक सांगचें दिसता की ‘तुम क्या जानो घुंटभर ‘च्या’ की किमत.’
अतिशा सुर्लीकार
7262849923
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
