भांगरभूंय | प्रतिनिधी
मनार घेतल्यार खंयचीच गजाल शक्य जायना अशें ना. श्रद्धाची सकारात्मक नदर आनी आपूण कितें तरी वेगळें
करतलें म्हणपाचो हावेस ताका कोंकणीतलें 326 पानांचें आनी 19 बायलांच्या मुलाखतींनी भरगच्च भरिल्लें अप्रुपायेचें पुस्तक ‘अस्तुरगाथा’ उजवाडाक हाडपाची ऊर्बा आनी प्रेरणा दिता हें दोळ्यांनी पळयतना तो खीण सगळ्यांकूच एके उमेदीन भारावन सोडटा.
मनशाचो मेंदू सारको आसत जाल्यार ती व्यक्ती कसल्याय आनी केद्याय व्हड धाडसाचें काम करपाक शकता. सगळो भडीभार आसता धडपडिचेर. ही धडपड मनशाचे सृजनात्मक निर्मितीक कारण थरता. हीच गजाल घडल्या श्रद्धाचे बाबतींत. मुळांत काव्याचीं बीजां तयार जावपी श्रद्धाचें भावूक मन जेन्ना विवीध विशयांचेर येवजूंक लागता तेन्ना ताका सांपडलें मुलाखतीचें विश्व. साहित्य निर्मितीक नवे नवे विशय लागता. वाचक नवें सोदता. कथा, कविता, कादंवरी, नाटक हांचे भायर आसा समीक्षा, संशोधन आदी. मुलाखत हो असोच एक प्रकार.
फाटलीं कितलीशींच वर्सां श्रद्धा हातरूणाचेर आसा, पूण ताणे विचारां कडेन केन्ना तडजोड केली ना. हांसतें मुखामळ आनी जगपा कडेन पळोवपाची हयकारी वृत्ती ताका दर दिसा नवें बळगें दित आसा.
11 मे दिसा दिलीप बोरकारांच्या बिम्ब प्रकाशनाचे वतीन उजवाडाक आयिल्लें हें पुस्तक श्रद्धा गरड हे कवयित्रीचे सुपीक तकलेंतल्यान भायर सरिल्लें एक अप्रूप देणे. चवकस नदर आनी मेंदवांतल्यान भायर सरिल्लीं विचार किर्णां उदेंत्या सुर्यावरी ताका नित्य नेमान उजवाडा कडेन व्हरतात.
कोंकणी चळवळिच्या संघर्शमय काळांत बायलांनी दाखयिल्लें धाडस अनुलेखित उरलां. जितलो आक्रोश चळवळी वेळार दाखयिल्लो तो आक्रस्ताळेपणा कोंकणी राजभास जैता उपरांत मोव जालो. दरेके बायलेक दिसलें, तेदे वेळार जें कितें घडलें तें सगळें पोटतिडकींतल्यान आनी अंतस्करणांतल्यान घडलें. आत्मप्रौढी मिरोवपा खातीर कोणें करूंक नाशिल्लें वा कितें मेळचें अशी आस्तय बाळगूं नाशिल्ली.
अशें आसलें तरी दखल घेवप चुकलें ना. “कोंकणी आंदोलनात बायलांचो वांटो” ह्या माथाळ्याखाला ज्युडीथ सिक्वैरा हाणी एक दीर्घ लेख बरयला तो ईकोनोमिक्स एण्ड पोलीटीकल वीकली वॉल्यूम 22, नं. 50, (डिसेंबर 12, 1987) हातूंत उजवाडाक आयला. तातूंत त्यो म्हणटात, कोंकणी चळवळींत बायलांचो सहभाग मोलाचो आसूनय कमिटीचेर फक्त दोन बायलो प्रतिनिधी आशिल्ल्यो. दादले आनी बायलो समानता मानता आसतना बायलांक निर्णय प्रक्रियेंत आस्पावन घेवपाक ही चळवळ उणी पडली. कितल्योशोच बायलो आपले आवयभाशे खातीर झुजपाक रस्त्यार देंवल्यो, मोर्च्यांत पुलिसांच्या लाठयांचो मार खाल्लो, सांखळ उपासाक बसल्यो. बायलांक संद दिली जाल्यार त्यो कितें करपाक शकतात हें ताणी दाखोवन दिलें.
आनी आज बाय श्रद्धान आपल्या मोबायला वरवीं 19 बायलांच्यो मुलाखती घेवन त्यो पुस्तक रूपान वाचप्यां मुखार दवरपाची ताचे धडपडींतल्यान साकारिल्ली ताची चिकाटी आमचे खातीर भोव मोलादीक अशेंच म्हणपाक जाय.
श्रद्धाक पेन हातांत धरून बरोवपाक जमना. ताच्यान उठपाक जायना. उभें रावपाक जायना. ताणे ई- मेल आनी वॉटसेपा वरवीं मुलाखतीं खातीर सगळ्या लागीं संपर्क सादलो. मुलाखती वाचीत जाल्यार त्यो प्रश्न धाडून आनी जापो धाडून आकाराक आयल्यात अशो दिसनात तर प्रत्यक्ष भेटींतल्यान आनी संवादांतल्यान साकारल्यात अशें भासता. ताचे हे शैलीक आनी कल्पकतेक एक परिपक्वता आसा. मुखार बशिल्ल्या मुलाखतकाराचे तकलेंतलें आनी मनांतलें वाचून मुलाखत घेवप हें काम तशें सोपें न्हय. पूण श्रद्धान कुशळटायेन आपल्या दोळ्यां मुखार ते ते अस्तुरेचें पात्र रंगयलां आनी एका ध्येयान हें काम तडीक पावयलां.
कोंकणी विशयांत बऱ्या मार्कांनी पास जावन धावेंत कोंकणी विशयांत पयलें इनाम मेळोवपी श्रद्धाची ओड कोंकणी बरोवपा कडेन वाडत गेली. कवितेंत ताका रस. तें म्हणटा 2005 त आपणें कविता बरयली आनी बाकीबाब बोरकार कविता सर्तींत वांटेकार जालें तेन्ना आपणाक तिसरें इनाम फाव जालें. श्रद्धाच्या तोंडार उदेल्लो आनंद ताच्या हांसत्या मुखाक
तेज हाडटा.
कांय गजाली साध्य जातात ताचे फाटल्यान एक खोल खंत कारण थरता तशी ती श्रद्धाचे बाबतींत घडली. ‘अस्तुरगाथा’ पुस्तकाची निर्मिती अशाच एका विचारांतल्यान जाल्या. 2007 वर्सा चित्रंगी साहित्य मेळाव्यांत वावुरतना ताका कोंकणी चळवळींत वांटो घेतिल्ल्या बायलांची सक्रियता हे संबंधी बरीच म्हायती मेळ्ळी. बायलांचो सहभाग, संघर्श, मोर्चा, उपोशणां, उपास, निवेदनां, पुलिसांचो लाठीचार्ज, दुखसर लाठयांचो पेट, रगतांय व्हांवलीं आनी कोंकणी राजभास जाली. खंत इतलीच, तें म्हणटा कॉलेजींत एम. ए. शिकतना कोंकणी चळवळ विशय आसून तातूंत कोणा अस्तुरीचें नाव नाशिल्लें. ह्या बायलांच्या कर्तुपी वावराचेर नदर ओडून घेना आसतना उरिल्लो विशय बाय श्रद्धान अळंग आपले विचारशैलीन एकोणीस बायलांच्या मुलाखतींतल्यान रूपकाराक
हाडला.
हेमा नायक
8956410326
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
