भांगरभूंय | प्रतिनिधी
लोकसभा वेंचणुकेच्या पांचव्या टप्प्यांतल्या मतदानाची प्रक्रिया सुरू जावचे आदीं दोन दीस नवी दिल्लींत आनी ते लेगीत अरविंद केजरीवाल हांच्या कोट्यांनी रुपयांच्या शिशमहालांतच घडिल्ल्या एका प्रकरणाचे पडसाद सद्या देशभर उमटत आसात, आनी आम आदमी पार्टी आनी काँग्रेस पक्षाचेर उरिल्ल्या दोन टप्प्यांत हें प्रकरण शेकूंक लेगीत शकता अशी चर्चा आसा. पांचव्या टप्प्यांत काल सोमारा आठ राज्यांतल्या 49 सुवातां खातीर मतदान जालें. राजनाथ सिंह, स्मृती इराणी, राहूल गांधी, फारूख अब्दुल्ला हांचे सारक्या फुडाऱ्यांचो फुडार ह्या टप्प्यांत ईव्हीएमांत सिलबंद जाला. पूण निमाण्या दोन टप्प्यांत विरोधकां खातीर नेमकें कसलें ताट वाडून दवरिल्लें आसत हाची मात निश्चिती स्वाती मालेवालच्या प्रकरणान कल्पना करूंक येतली. सर्वोच्च न्यायालयान जी संद दिल्या ताचे दिल्लीचे मुख्यमंत्री भांगर करतले अशें सगल्यांकूच दिसतालें. पूण भाजपाकूय केजरीवाल 21 दिसां खातीर बंदखणी भायर आयिल्ल्यान एकूण परिस्थितींक फरक पडूंक शकतलो अशी धाकधूक दिसप सभाविकूच आशिल्लें. पूण खंयचे कितें सुप्रीम कोर्टांत जें जोडलें तें व्हगडपाचें काम अरविंद केजरीवाल आनी तांच्या पंगडान केलें. तांणी आपल्याच पांयार फातर मारून घेतलाे. आम आदमीच्यो राज्यसभा खासदार आनी दिल्ली महिला आयोगाच्यो आदल्यो अध्यक्ष स्वाती मालेवाल हांची मुख्यमंत्र्याच्या घरांत जाल्ली मारपेट आनी उपरांत हें प्रकरण आंगार येवचें न्हय हे खातीर स्वता केजरीवाल हांचे सयत आपाच्या सगल्याच फुडाृयांनी केल्ले यत्न हातूंतल्यान तांचो खरो चेरो उक्तो जाला. केजरीवालाक बंदखणींतल्यान मेळिल्लो ब्रेक तांकां ह्या प्रकरणांत सारवासारोव करपा खातीरच घालोवचो पडटलो अशेंच चित्र दिसून येता.
पांचव्या टप्प्यांत भाजपा खातीर उत्तर प्रदेश आनी महाराष्ट्रांत निर्णायक अशें मतदान जालां. तरी फुडले दोन टप्पे आम आदमी खातीर निर्णायक स्वरुपाचे आसतना केजरीवाल हांकां स्वता मालेवालच्या रुपान असो एक धपको बसलो की दिल्लींत आनी पंजाबांत मतदारां मुखार वचप तांकां कठीण जालां. कोण खंयच्यो स्वाती मालेवाल अशें आतां आपाचे फुडारी म्हणत आसतले, पूण ह्या प्रकरणांत भारतीय जनता पक्ष मात मालामाल जाल्ल्याचें त्या पक्षाच्या फुडाऱ्यांची देहबोली पळयतकूच दिसून येता. कथीत मद्य घोटाळ्याक लागून पयलींच बदनाम जाल्ल्या आम आदमी पक्षाक स्वाती मालेवाल प्रकरण अदीक सादुरतायेन हाताळूंक येता आशिल्लें. पूण आपल्या निजी सचिवाक वाटावपाच्या यत्नांत केजरीवाल हांणी स्वताचें हांशे तर करून घेतलेंच, पूण दिल्लींतल्या मतदारांच्या हातांत अशें एक अस्त्र दिलां की मतदाना वेळार ते वापरतना तांकां आतां फाटीं फुडें पळोवापची गरज उरतली अशें दिसना. स्वताच्या पक्षाच्या महिला खासदाराची स्वताच्याच घरा कडेन स्वताचोच निजी सचीव मारपेट करता आनी हें प्रकरण चेपून उडोवपा खातीर मुख्यमंत्र्या सयत आम आदमी पक्षाच्या सगल्याच फुडाऱ्यांनी दिल्लींत नौटंकी करची हांचें लोकांक अजाप दिसप सहाजिकूच आसा. कोण हो मुख्यमंत्र्याचो निजी सचीव विभव कुमार, स्वाती मालेवाल हांकां मुख्यमंत्र्याच्याच घरा खर मारपेट करता आनी उपरांत केजरीवाल हांचे सयत तो लखनौक वता. आनी ताचे फुडलें अजाप म्हणल्यार एफआयआर दाखल जावन लेगीत मुख्यमंत्र्याच्या घरांत तो लिपून बसता. हें सगलें सर्वसामान्य मनशाच्या विचारा फुडलें आसा.
स्वाती मालेवाल हांकां मारपेट कित्याक केली. हाचें फाटलें कारण भायर येतलेंच. पूण हें प्रकरण अरविंद केजरीवाल हांणी जे पद्दतीन हाताळ्ळां ते पळयत जाल्यार तेवूय आतां संयम व्हगडावन बसल्यात अशेंच चित्र दिसून येता. ‘इंडी’ आघाडीतल्या काँग्रेस पक्षाकूय ह्या प्रकरणांत केजरीवाल हांकां सांगात दिवप कठीण गेलां, आनी तांणी आपली असहाय्यता उक्तायल्या. स्वाती मालेवाल मारपेट प्रकरण हें भाजपाचेंच एक षडयंत्र आशिल्ल्याचो दावो करून केजरीवाल ताचे पसून वेगळे रावंक पळयतात हें जरी खरें आसलें तरी राजकारणांत काल पयर दाखल जाल्लें शेंबडें भुरगें लेगीत ताचेर विस्वास दवरचें ना. केजरीवाल हांचो असोय दावो आसा की प्रधानमंत्री नरेंद्र मोदी हांणी आम आदमी पक्षाच्या विरोधांत सुरू केल्ल्या ‘ऑपरेशन झाडू’ मोहिमेचेंच हें षडयंत्र म्हणल्यार एक भाग आसा. हांगाच केजरीवाल रावनात. जाल्यार आपल्या आसा त्या फुडाऱ्यांक घेवन ते भाजपाच्या मुख्यालयाचेर धडक दिवपाचीय नौटंकी करतात हाका कितें म्हणचें. आम आदमीच्या सगल्याच फुडाऱ्यांक बंदखणींत धाडून आपलो पक्षूच सोंपोवपाचो आसा आनी ते खातीर आमकां अटक करपाचीच आसत जाल्यार आमी हजर आसात अशें केजरीवाल सांगतात तेन्ना मात केजरीवाल हांचीय नौटंकी लोकांच्या लक्षांत येता. बंदखणींत वचपाची जर तयारीच आसत जाल्यार आपणाक मेळिल्लो जामीन रद्द करूंक शकता आनी बंदखणींत वचून रावंक शकतात असो सल्लो जर लोकांनी तांकां दिलाच जाल्यार चुकीचें कशें म्हणूंक येतलें.
लोकसभा वेंचणुकेच्या निर्णायक टप्प्यांत केजरीवाल हांणी भाजपाच्या हातांत हें कोलितूच सोंपयलां हातूंत दुबाव ना. स्वाती मालेवाल हांकां भाजपानून मुख्यमंत्र्याच्या घरा कडेन धाडिल्ली असोय दावो दिल्लीच्यो मंत्री आतीशी करतात, तशें आसत जाल्यार विभव कुमाराकूय भाजपानूच स्वातीक मारपेट करपाक सांगिल्लें बी ना मूं? असो तर्क कोणेय काडचो. मुख्यमंत्र्याचे सचीव आशिल्ले विभव कुमाराची चूक आम आदमी पक्षाक बरीच म्हारग पडूंक शकता. दिल्लींतलें मतदान सामकें लागीं आयिल्लें आसतना हें सगलें घडचें हाचें अजाप दिसता.
केजरीवाल हांचे कडेन फक्त आठ ते धा दीस उरल्यात. आनी ह्या काळांत आपल्या सचिवाक वाटावप काय पक्षाच्या प्रचाराक प्राधान्य दिवप हें तांकां थारावचें पडटलें. भाजपाच्या विजयरथाच्या दिल्लींतल्या मार्गांत येवंक पळोवपी आडमेळीं ह्या प्रकरणान पयस जाल्यात. पूण स्वाती मालेवाल प्रकरणाच्या मुळांत वचून ते जाणून घेवपाचे कुतूहल मात वाडलां. धा-इकरा दिसांत लोकसभा वेंचणुकेचो अध्याय पुराय जायत आसून निकालाचे वेध लोकांक आतां सावनूच लागल्यात. ‘इंडी’ आघाडेंत सगलें कितें सुरळीत चल्लां अशें म्हणप धाडसाचें थारतलें. वायनाडांत राहूल गांधीच्या विरोधांत लडपी उमेदवार रायबरेलीतल्या तांच्या तांचे खातीर प्रचार करता हें फक्त ‘इंडी’तूच घडूंक शकता. आपली चूल वेगळी मांडून बंगालात काँग्रेसी कडेन झुजपी ममता बॅनर्जी आपूण इंडीचोच वांटो आशिल्ल्याचें सांगतात हेंवूय अजाप. वेंचणूक निकला उपरांत दरेकाक आपआपली सुवात कळून चुकतली. महाराष्ट्रांतूय ताका आडवाद ना. ते तुळेन एनडीएक महाराष्ट्रांतूच महाविकास आघाडी आडावंक शकतली असो अदमास उक्तयतात. महाराष्ट्रांतलें मतदानूय काल साेंपिल्ल्यान तर्क वितर्क लडयतात आनी निकाला मेरेन तरी हें सगलें चालूच उरतलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
