भांगरभूंय | प्रतिनिधी
बांधकाम खात्या कडल्यान दुरूस्ती सुरू
पणजी, प्रतिनिधी : वातानुकूलीत यंत्रणेत (एसी) इबाड जाल्ल्यान कला अकादमीच्या दीनानाथ मंगेशकार कला मंदीरात पावसाचे उदक झिरपता. एसी यंत्रणेत दुरूस्तीचें काम सुरू जालां. वातानुकूलीत यंत्रणेच्या उदका खातीर जीं पायपां घाल्यां (एसी डक्ट) तातुंल्यान उदक कला मंदिरांत झिरपता, अशें बांधकाम खात्याचे प्रधान मुखेल अभियंते उत्तम पार्सेकार हांणी सांगलें.
दुरूस्तीचे काम बेगिनात बेगीन पुराय करपाचे येत्न आसा, अशें तांणी सांगलें. आयतारा पावसाक लागून कला अकादमींत दीनानाथ मंगेशकार सभाघरांत उदक झिरपपाक लागलें. तियात्र सुरू आसतानाच उदक झिरपपाक लागिल्ल्यान दर्शक बेजारले. तांकां फाटीं रावून तियात्र पळोवचें पडलें. सुमार वरभर दीनानाथ मंगेशकार सभाघरांत उदक झिरपतालें.
कला अकादमीच्या दुरूस्ती कामां विशीं आतां लोक दुबाव घेवपाक लागल्या. फाटल्या म्हयन्यांत जेन्ना पणजे पावस पडिल्लो तेन्नाय कला अकादमीच्या पाख्याक गळटी सुरू जाल्ली. पाख्यार झाडांचीं पानां एकठांय जाल्ल्यान गळटी लागलीं असो अहवाल तेन्ना बांधकाम खात्यान दिल्लो. पयल्या पावसान पाख्याक गळटी लागले उपरांत आयतारा परतून पाखें गळपाक लागलें. तेन्ना कंत्राटदाराचेर कारवायेची मागणी जाताली. भौशिक बांधकाम खात्यान मात कंत्राटदाराक ‘क्लीन चीट’ दिली.
कामाचे ऑडिट करात : गोवा फॉरवर्ड
कला अकादमीच्या कामाचे ऑडिट करचें आनी चार्ल्स कोरीया फाउंडेशनाचो कामाविशी सल्लो घेवचो अशी मागणी गोवा फॉरवर्डान केल्या. फाटलें खेपे जेन्ना पावस पडिल्लो तेन्ना कला अकादमीच्या पाख्याक गळटी लागिल्ली. आता परतून गळटी लागली. ही गंभीर घडणूक आसा. मुख्यमंत्री डॉ. प्रमोद सावंत हांणी कामाची पळोवणी करून चार्ल्स कोरीया फाउंडेशनाक ओन बोर्ड घेवचें अशी मागणी गोवा फॉरवर्डाचे फुडारी दुर्गादास कामत हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
