भांगरभूंय | प्रतिनिधी
न्यूयाॅर्क, खबरां संस्था: अमेरिकेंत सध्या भारतीय वंशाच्या लोकां आड खंडणीचीं प्रकरणां व्हडा प्रमाणाचेर वाडिल्लीं दिसतात. फाटल्या कांय दिसांनी खंडणी घेवपी टोळयेन भारतीयां कडल्यान सुमार १ हजार कोटी रुपयांची वसुली केल्या. सध्या अमेरिकी तपास संस्था फेडरल ब्युरो ऑफ इन्व्हेस्टिगेशनने (एफबीआय) प्रकरणाची चवकशी सुरू केल्या. कॅलिफोर्नियाच्या सॅक्रामेंटोंत एफबीआयच्या प्रादेशीक कार्यालयान शिटकावणी जारी करून सांगलें, टोळी खूप वायट तरेन वसुली करतात. ते पयशां खातीर धमकी, हिंसाचार आनी मारून उडोवपाचीय धमकी दितात.
एफबीआय प्रमाण, खंडणी टोळयेचे वांगडी सुरवातेक फोन करून धमकायतात. तशेंच खुबश्या प्रकरणांत घरां आनी वाहनांक नेम धरून फारपेटूय करतात. अशे तरेन जावपी वसुलीचो ट्रेंड हुस्को करपी आसा. अमेरिकेंत फाटल्या वर्साचे तुळेंत खंडणीचे घडणुकेंत २०% वाड जाल्या. अधिकार्यां प्रमाण, भारतीयां कडल्यान खंडणी उखलपाच्यो घडणुको चड आसपाक शकतात. कारण अशा प्रकरणांत कागाळी उण्यो दाखल जातात.
एफबीआयक असो दुबाव आसा, अमेरिकेंत वसुली करपी टोळयेचो कॅनडांतले टोळये कडेन संबंद आसपाक शकता. संस्थेन ह्या सगळ्यांचें कनेक्शन भारता कडेनूय आसपाक शकता. जाचे कडल्यान खंडणी वसूल करतात तातूंत बिझनसमन, समाजांतले प्रतिश्ठीत लोक आनी गिरेस्त भारतीयांचो आसपाव आसता.
एफबीआयच्या हेट क्राइम स्टॅटिस्टिक्स रिपोर्ट प्रमाण, दक्षीण आशियाई वंशाचे लोक विशेश म्हळ्यार भारतीयां आड हेट क्राइमच्यो घडणुको वाडल्यात. अमेरिकेंत फाटल्या वर्सा हेट क्राइमच्या आकड्यांत १७% वाड जाली. शीख समाजा आड दुस्वासाच्या गुन्यांवांत सगळ्यांत चड वाड जाल्या. फाटल्या वर्सा हो समाज १९८ वेळा अशा घडणुकांक सामकार गेलो. हेट क्राइम प्रकरणांत अमेरिकेचे कॅलिफोर्निया राज्य सगळ्यांत मुखार आसा.
भारतीय वंशाचे एफबीआय एजंट सिद पटेल हांचे कडेन खंडणी कडेन संबंदी प्रकरणांचें फुडारपण आसा. सिद हांचे प्रमाण, हालीं भारतीयां कडल्यान खंडणी घेवपाच्यो समस्या सामान्य आसात. आदीं अशे तरेची वसुली जायनाशिल्ली. ह्यो व्हडा प्रमाणांतल्या खंडणीच्यो घडणुको जावन आसात. भारतीय समाजा खातीर धोको पळयल्यार एफबीआयन इंग्लीश भाशे बगर हिंदी, पंजाबी आनी उर्दू सयत खुबश्या भाशांक शिटकावणी जारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
