प्रज्ञावंत विद्यार्थी दर्श राजेंद्र पोळजी

भांगरभूंय | प्रतिनिधी

खंयचोच पालक आपल्या भुरग्याक जन्मभर  पळोवंक शकना. पूण बरें शिकप आनी बरे संस्कार दिवन आपल्या भुरग्याक स्वावलंबी करपाक शकता.

पयर म्हजी सकाळ उदेली तीच खोशयेन. इकोट्रेकच्या भोंवडे वयल्यान हिमालयांत सावन परत गोंयांत येतना उर्जा फावंडेशनचे मुखेली दुर्गादास परब हांणी खूब आनंदाची खबर म्हाका  कळयली. उर्जा फावंडेशनची शिष्यवृत्ती फावो जाल्लो दर्श राजेंद्र पोळजी हो भुरगो शाळेंत विज्ञान विशयांत पयलो आयलो.

2013 वर्सा दुर्गादास परब हांणी उर्जा फावंडेशनची स्थापना केल्ली. गांवगिऱ्या वांठारांनी जायते भुरगे घरचे गरिबीक लागून शिक्षणा पासून वंचीत उरतात. दुर्गादास हो खुद्द विर्नोडा सारक्या गांवांतलो. तांणी भुरगेपणांत आपले सरभोंवतणी वांगडच्या भुरग्यांक पळयल्ले. कांय भुरगे हुशार आसतात. पूण गरिबीक लागून मुखार शिकपाक पावनात. अश्या भुरग्यां खातीर धावेक पावतकूच तीन हजार रुपयांची शिष्यवृत्ती दिवपाची येवजण उर्जा फावंडेशनचे वतीन सुरू केल्ली. सुरवातेक फक्त पेडणें म्हाला खातीर सुरू केल्ली ही येवजण दानशूर लोकांच्या आदारान आतां बार्देस, सत्तरी आनी दिवचल, सांगें आनी काणकोण  तालुक्यांतल्या भुरग्यांकूय दितात. ही शिष्यवृत्ती मेळोवपा खातीर त्या गरीब विद्यार्थ्याक णववेक उणेच ते पन्नास टक्के मार्क पडूंक जाय. एका शाळेंतल्या तीन भुरग्यांक ही शिष्यवृत्ती मेळटा. पोरूं 136 शाळेंतल्या ४०६ विद्यार्थ्यांक एकूण बारा लाख पन्नास हजार रुपया शिष्यवृत्तीच्या रुपान दिल्या. अंदूं सावन ही येवजण फोंडें म्हालांतल्याय भुरग्यांक दिवपाचो निर्णय जाला. जून म्हयन्याचे अखेरेक ही शिष्यवृत्ती दितात.

काल धावेचो निकाल आयलो. उर्जा फावंडेशनची शिष्यवृत्ती मेळिल्ले सगळे विद्यार्थी उत्तम श्रेणींत पास जाले. ह्या परिक्षेंत दर्श राजेंद्र पोळजी हो खास क्षमता आशिल्लो भुरगो 82% मार्क घेवन पास जालो. हो भुरगो सदांच चलत्या कदेलाचेर बसून आसता. पोरुं संत सोहिरोबा म्हाविद्यालयांत जाल्ले कार्यावळींत हांव ताका मेळिल्लों. शारिरीक उणाव आसलो तरी मुखामळार तेज दिसतालें. ताणें शिक्षणान आपल्या आंगांतल्या उणेपणाचेर मात केली.

पेडणें तालुक्यांतल्या देवसू, कोरगांवच्या प्रज्ञा हायस्कुलाचो विद्यार्थी दर्श पोळजी जन्मा सावन हुशार. पूण शरीर ताका साथ दिनासलें. जे पिरायेर भुरगीं चलपाक शिकतात तेच पिरायेर सावन ताका चलत्या कदेलाचो आदार घेवंचो पडलो. तो   स्वावलंबी आनी जिद्दी. सर्वसामान्य भुरग्यांभशेन कसलीच सवलत न घेतां शिकपाची ताची खर इत्सा आसा. ताका स्वताक सिद्ध करून दाखोवपाची उमेद आसा. शिक्षणाच्या माध्यमांतल्यान आपल्या शरिरांत जे दोश आसात ताचेर आपूण मात करतलों आनी एकदीस व्हड मनीस जातलों हो ताचो हावेस आसा. 

दर्शाचें मुळावें शिकप कोरगांव मायणा हांगां सरले सरकारी शाळेंत जालें. ताचें शरीर ताका साथ दिना तरी तो हार मानपाक तयार ना.  ताचो दावो हात अजिबात चलना. उजव्या हातान तो प्रयत्नपुर्वक बरोवपाचो यत्न करता. उजव्या हातान पेन धरपाक लेगीत ताका त्रास जातात. देखून सर्वसामान्य भुरग्यां परस ताची बरोवपाची गती उणीच. प्रज्ञा हायस्कुलाची मुख्याध्यापक मिनी हांणी शालांत परिक्षा मंडळाक विनवणी करुन ताचे खातीर पेपर बरोवपाक अर्द वर चड मागून घेतलें. शालांत मंडळानूय तांची ही रास्त मागणी मानून घेतली. दक्षान मेळिल्ल्या संदीचो योग्य उपेग करुन सगळ्या विशयांनी बरे मार्क घेवन एकूण 82% मार्क मेळयले तशेंच विज्ञान विशयांत सगळ्यांत चड मार्क मेळोवन शाळेंत पयलो आयलो. सगळ्यांनीच देख घेवपासारकी ही गजाल.

प्रज्ञा हायस्कुलाची मुख्याध्यापक आनी हेर शिक्षकांनी दर्शाक सदांच उर्बा दिली. शाळेंत ताका कसलेच त्रास जावंचे न्हय हाची तांणी काळजी घेतली. दर्श सदांच चलत्या कदेलाचेर आशिल्ल्यान ताका शाळेंत हाड व्हर करपाची जबाबदारी ताच्याच काकान उखल्ली. शाळेन सुरवेक ताचे खातीर सर्व शिक्षा अभियानाची शिष्यवृत्ती मेळोवन दिली. उपरांत आठवी ते धावी मेरेन  शिक्षक तशेंच स्वता हेडमास्तरान ताका आपले गाडयेन हाड व्हर करपाची वेवस्था केली. शाळेचे शिक्षक आनी हेडमास्तर हांची तोखणाय करीत तितली थोडीच. आनी फक्त दर्श न्हय तर हेर विद्यार्थ्यां खातीर शाळा तितलीच आपलेपणान वावुरता हें तांचो निकाल पळयल्यार सिद्ध जाता. अंदूं ह्या प्रज्ञा विद्यालयाचो धावेचो निकाल 100% लागला. सगळ्यांचें अभिनंदन. 

दर्शाचो जन्म जालो एका गरीब कुटुंबांत. राजेंद्र पोळजी एका खाजगी आस्थापनांत काम करतालो. आतां तो निवृत्त जाला. पूण खाजगी नोकरी जाल्ल्यान ताका सरकारी नोकरेंत मेळटा तशे निवृत्तीचे कसले लाब मेळूंक पावले नात. आवय आपल्या परीन काम करुन संवसाराचो गाडो चलयता. घरची गरिबी आसून लेगीत ह्या पालकांनी आपल्या भुरग्याक शिक्षणा पसून वंचीत केलो ना. ताका आपल्या पांयार उबो रावपाक सदांच प्रोत्साहीत केलो. पालकांनी भुरग्यांक दिल्लो होच खरो मोग आसता. खंयचोच पालक आपल्या भुरग्याक जन्मभर  पळोवंक शकना. पूण बरें शिकप आनी बरे संस्कार दिवन आपल्या भुरग्याक स्वावलंबी करपाक शकता. दर्शाच्या पालकांनी समाजाक हीच देख दाखोवन दिल्या. आयज मेरेन सामाजिक संस्था, शिक्षक तशेंच दानी लोकांनी जसो आदार दिला तसोच फुडाराकूय ताच्या शिक्षणाचो खर्च उखलपाक समाजांतले आनीकूय दानशूर सज्जन मुखार येतले हाचो विश्वास बाळगूं येता.

सद्या प्रज्ञा हायस्कुलाची हेडमास्तर दर्शा खातीर सकयल्या मजल्यार अकरावीचे वर्ग घेवपी हायर सेकंडरी सोदता. दर्शा सारके आनीकूय विद्यार्थी वेगवेगळ्या शाळांनी शिकता आसतले. हांकां कदेला सयत वयल्या मजल्यार व्हरप शक्य ना. दर्शाक शालांत मंडळान परिक्षे खातीर खासा वेवस्था केली. पूण मुखार दर एक म्हाविद्यालयांत वर्ग सकयल हाडप शक्य जावंचें ना. देखून सगळ्या शाळा म्हाविद्यालयांनी हाची दखल घेवन अश्या भुरग्यांक वर्गा मेरेन पावोवपाची आनी देंवोवपाची वेवस्था करप गरजेचे आसा.  दर्शाच्या निमतान इतलें जरीं जालें तरी खुबशे पालक आनी विद्यार्थी हुस्क्या मेकळे जातले. शिक्षण खातें हो विशय गंभीरपणान घेतलें अशी अपेक्षा आसा.

– उदय नरसिंह म्हांबरो

 9420766769