भांगरभूंय | प्रतिनिधी
मडगांव, प्रतिनिधी : श्री शांतादुर्गा कुंकळ्ळीकान्न संस्थानाच्या वांगडी आनी महाजनां विशीं फट आनी अपमान करपी टिप्पणी केल्ल्या प्रकरणांत श्रेया धारगळकार, नमिता फातर्पेकार आनी अभिषेक नायक हांचे आड गुन्यांव नोंद केला. हे विशीं कुंकळ्ळी पुलीस फुडलो तपास करतात.
मेळिल्ले म्हायती प्रमाण, कुंकळ्ळेंच्या श्री शांतादुर्गा कुंकळ्ळीकान्न संस्थानाचे अध्यक्ष कवेंद्र देसाय हांणी वांगडी आनी महाजनां सयत पुलीस स्टेशनाचेर वचून श्रेया धारगळकार (रा. उत्तर गोंय), नमिता फातर्पेकार आनी अभिषेक नायक (दोगांय फातर्पा, केपें) आड गुन्यांव नोंद केलां. त्या तिगांयनी देवस्थानाचे मालमत्तेंत घुसून धर्मीक भावना दुखयल्यात आनी धर्मां मदीं वाद निर्माण जावपा सारकीं वक्तव्यां केल्यांत. उपरांत हो व्हिडिओ तांणी सोशल मिडियाचेर व्हायरल केलो, अशी कागाळ पुलिशेंत केल्या.
पुलिसांनी हे कागाळी प्रमाण तिनूय दुबावितांनी व्हिडिओ वरवीं श्री शांतादुर्गा कुंकळ्ळकान्न संस्थान वांगडी आनी महाजनां विशीं चुकीचीं वक्तव्यां करप, असभ्य भास वापरुन हिंदूंच्यो भावना दुखोवप, देवस्थाना विशीं बदनामी करपी वक्तव्यां करप, धर्मीक वक्तव्यां वरवीं हिंदुंच्यो भावना दुखोवपाचो यत्न केल्ले खातीर गुन्यांव नोंद केला. कुंकळ्ळें पुलीस स्टेशनार व्हडा प्रमाणांत भावीक हाजीर आशिल्ले. हे विशीं पुलीस निरीक्षक डायगो ग्रॅसिअस हांच्या मार्गदर्शनाखाला पुलीस उपनिरीक्षक कविता राऊत फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
