भांगरभूंय | प्रतिनिधी
पणजी, प्रतिनिधी : नुस्त्यांच्या तांतयांची जतनाय करपा खातीर दर वर्सा प्रमाण नुस्तेमारी खात्यान अंदुं दोन म्हयन्यां खातीर नुस्तेमारी बंदीची घोशणा केल्या. 1 जुन ते 31 जुलय मेरेन ही नुस्तेमारी बंदी आसतली. सुता पुनवेच्या म्हूर्ताचेर नुस्तेमारी बंदीचो शुभारंभ जातलो. नुस्तेमारी बंदी आसली तरी पारंपरीक होडी वा बोटीन (10 एचपी मोटार ) नुस्तेमारी करपाची मेकळीक आसतली. मेकॅनिकल ट्रॉलर वा पर्स सीने नेटच्या आदारान मात नुस्तेमारी करपाक मेळची ना, अशें नुस्तेमारी खात्यान अधिसुचोवणेत स्पश्ट केलां. पावसाच्या पयल्या दोन म्हयन्यांत बऱ्याच जातींचे नुस्तें तांतयां घालतात. ट्रॉलरान नुस्तेमारी जाली जाल्यार तीं नश्ट जावन नुस्त्याचें उत्पादन उणें जावपाची भिरांत आसता. हाका लागून जून आनी जुलय हे दोन म्हयने ट्रॉलराच्या आदारान नुस्तेमारीचेर बंदी आसता. नुस्तेमारी खातें दर वर्सा अधिसुचोवणी जारी करून बंदी जाहीर करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
