भांगरभूंय | प्रतिनिधी
रु. 86 लाख अजून मेरेन उरल्यात आडकूनः गोंय सरकारी कर्मचारी संघटना
पणजी, प्रतिनिधी: गोंय सरकारी कर्मचारी संघटनेन म्हापसा अर्बन बँकेंत रु 91 लाख डिपोजीट केल्ले. पुण बँक बुडिल्ल्यान आमचे रु. 86 लाख आतां मेरेन म्हापसा अर्बन दिवची उरल्या. देखून आमकां संघटना चलयतना सोंसचे पडटात. हे पयशे आमकां परत दिवचे म्हण आमी प्रशासक आनी सराकारा कडेन फाटपुरवण करत आसात, अशें गोंय सरकारी कर्मचारी संघटनेचे अध्यक्ष अभय मांन्द्रेकार हांणी सांगलें.
संघटनेची वर्सुकी आम बसका गोंय राज्य सहकार संकुलांत आयतांरा जाली. बसका जाले उपरांत संघटनेच्या पदाधिकाऱ्यांनी पत्रकार परिषदेतल्यान बसकेचे मुद्दे मांडले. अध्यक्ष अभय मांन्द्रेकार, उपाध्यक्ष पुरुषोत्तम आगेल, सरचिटणीस समीर नागवेंकार, सचिव रुपेश म्हापशेंकार, भांडारी दिनेश नागवेंकार आनी हेर पदाधिकारी हजर आशिल्ले. सरकारी सेवेत निवृत्तीत वाड आनी जुने पॅन्शन येवजण लागू करपाचो विशय हे बसकेंक चर्चेंक आयलो.
गोंय सरकारी कर्मचारी संघटनेच्यो ठेवी आमी म्हापसा अर्बन बँकेंत दवरल्यात. पुण बँक बुडले कारणान आतां संघटना चलोवप कठीण जालां. संघटेनेचे वांगडी आपल्या बोल्सांतल्यान दुडू मोडून ही संघटना चलयतात. आमचे उरिल्ले रु 86 लाख परत दिवचे म्हण आमी बँकेच्या प्रशासकाचीय भेट घेतल्या. हे पयशे बेगीन संघटनेक दिवपाची मागणी आमी सरकारा कडेन केल्या. पत्रवेवहार चालूच दवरला, अशे मांन्द्रेकार हांणी सांगलें.
सरकारी सेवेंत आशिल्ले तरणाटे कर्मचारी अजूनय संघटनेचे वांगडी जांवकनात. दरेक तालुक्यांनी आमची समिती गठीत जाल्या. तरणाटे कर्मचाऱ्यांनी स्वता फुडें येवन फोर्म भरून आपली नोंदणी करपाक जाय. जर आमी सगळे एकठांय आयलेच जाल्यार पोरणे पेन्शन येवजणेचो विशय सुटावो जातलो, अशें मांन्द्रेकार हांणी सांगलें.
पोरण्या पॅन्शनाचो विशय गोंय सरकार आनी मुख्यमंत्री प्रमोद सावंत हांणे केंद्र सरकारा म्हऱ्यांत दवरला. आमी हाचेर ठाम आसात आनी तांची फाटपुरवण आमी करत आसात. सरकारान आमका आश्वासन दिलां. मुख्यमंत्री दोतोर प्रमोद सावंत हांणी आमकां केन्नाच ना म्हणूंक ना. सदांच मजतीचो हात दिला, अशे मांन्द्रेकार हांणी सांगले.
ते भायर निवृत्त जाल्ले सरकारी कर्मचाऱ्यांक सेवा वाड दिवप बंद करची म्हण आमचे पत्र वेवहार चालूच आसा. जर हे बंद जावंकना जाल्यार आमी फुडली कृती कितें आसतली तें थारायला. आमचे चडशे कर्मचारी वेचणुकेंच्या ड्युटीचेर आशिल्ले कारणांन हाचेर चड काम करपाक मेळुंकना. आमी ह्या विषयाचेर सामकेच ठाम आसात, अशे मांन्द्रेकार हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
