भांगरभूंय | प्रतिनिधी
तरौना, खबरां संस्था: लग्ना भायल्या संबंदांक लागून खून जाल्ल्याचीं जायतीं प्रकरणां उक्ताडार येतना दिसतात. मात, बिहारांत वेगळोच प्रकार घडलो. नव्यान लग्न जाल्ल्या जोडप्यान पुलिसांचे बंदखणींतूच आत्महत्या केल्या. आत्महत्याची खबर आयकून थळाव्या लोकांनी शुक्रारा पुलीस स्टेशनाचेरच हल्लो केलो.
तरौना गांवांतल्या एकल्यान आपले नेण्टे पिरायेचे मेवणे कडेन लग्न केलें. ही मेवणेची पिराय फकत १४ वर्सां जावन आसा. आपल्या घोवान आपले नेण्टे पिरायेचे भयणी कडेन लग्न केलां हें समजताच बायलेन ताचे आड पुलिशेंत कागाळ केली. हे कागाळी प्रमाण ह्या जोडप्याक अटक केली. मात, बंदखणींत गेले उपरांत ह्या जोडप्यान गोळ घेवन आत्महत्त्या केली.
ह्या जोडप्यान आत्महत्त्या केल्ल्याचें कळटकच गांवचे लोक पुलीस स्टेशनाचेर जमले. लोकांनी पुलीस स्टेशनार येवन बरोच बोवाळ केलो. इतलेंच न्हय तर रागान भरिल्ल्या लोकांनी पुलीस स्टेशनाचे इमारतींत उजो लायलो आनी पुलिसांचेर फातर शेवटायले. हातूंत जखमी जाल्ल्या तीन पुलिसां मदल्या एकल्यान अररियाचे सहाय्यक पुलीस अधीक्षक रामपुकर सिंह हांणी, गांवचे लोक पुलिसांचें आयकूंक तयार नाशिल्ले आनी तांणी आमचेर हल्लो केलो. पुलिसांनी ताचो प्रतिकार करून फारपेट केलो आनी हातूंत दोग जाण जखमी जाले.
जोडप्याचो खून?
ह्या जोडप्याक आत्महत्याक लागून न्हय तर पुलिसांनी केल्ले मारबडयक लागून मरण आयिल्ल्याचो आरोप तांच्या कुटुंबांतल्या लोकांनी केला. अररिया पुलीस अधीक्षक डॉ. अमित रंजन हांणी दावो न्हयकारलो आनी तो आत्महत्याचो प्रकरण अशें म्हणलें. तशेंच पुलीस स्टेशनाचेर हल्लो केल्ल्यान १९ जाणांक अटक केल्या अशें तांणी फुडें स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
