भांगरभूंय | प्रतिनिधी
इंडीयन प्रिमीयर लिगेची (आयपीएल) 69वी मॅच येजमान सनरायझर्स हैदराबाद आनी पंजाब किंग्स ह्या पंगडां मदीं हांगाच्या राजीव गांधी आंतरराष्ट्रीय स्टेडीयमाचेर जातली.
प्ले ऑफांतल्यो चारूय मॅची निश्चीत जाल्यात, मागेर ही मॅच कित्याक म्हत्वाची आसा असो प्रस्न कांय जाणांक पडुये. हे मॅची पयलीं खंयचे पंगड प्ले ऑफाक पात्र जातले असो प्रस्न सगल्यांक पडिल्लो. पूण, आतां असो प्रस्न उप्रासला की पयल्या दोन सुवातांचेर खंयचे पंगड आसतले.
सध्या गुणतकट्यांत राजस्थान रॉयल्स 16 गुणां सयत दुसरे आनी सनरायझर्स हैदराबाद 15 गुणां सयत तिसरे सुवातेर आसा. राजस्थान आपली निमाणी मॅच हारता वा पावसाक लागून मॅच रद्द जाता जाल्यार सनरायझर्स हैदराबादा कडेन दुसरे सुवातेर येवपाची संद आसा.
दोनूय पंगडां मदीं अजून मेरेन आठ मॅची जाल्यात आनी हातूंतली फकत एकूच मॅच पंजाबान जिखल्या. 2021 उपरांत दोनूय पंगडां मदीं स मॅची जाल्यात आनी हांगा लेगीत हैदराबादाचेंच दालें जड आसा. चार मॅची हैदराबादान आनी दोन मॅची पंजाबान जिखल्यात.
हैदराबादाचो हॅन्रीक क्लासेन फॉर्मांत आसा. पूण, पंजाबाच्या दोन बॉलरां आड ताचो रॅकॉर्ड बरो ना. पयल्या बॉलराचें नांव आसा हर्षल पटेल आनी दुसरो बॉलर कगिसो रबाडा. दोगांयनी टी-20 क्रिकेटींत क्लासेनाक तीन-तीन खेपे बाद केला. हर्षला आड 30 बॉल खेळटना क्लासेनान फकत 38 धांवड्यो केल्यात. रबाडा सध्या दुखापतीक लागून पंगडांतल्यान भायर आसा. ताका लागून क्लासेनाक आडावपाची सगली भिस्त हर्षलाचेर आसतली.
हैदराबादाचे बॅट्समन चवके आनी सके मारपाक प्रसिद्ध आसात. मदल्या ओव्हरींनी लेगीत तांणी दरेक मॅचींत सरासरी पांच सके मारल्यात. पावर प्लेंत तांणी अजून मेरेन 49 सके मारल्यात. अखेरच्या ओव्हरींनी 41 सके मारल्यात. अंदूंच्या हंगामांत पावर प्लेंत सगल्यांत चड सके मारपाचो रॅकॉर्ड अभिषेकाच्या नांवार आसा. ताणें 24 सके मारल्यात. दुसरे सुवातेर हैदराबादाचोच दुसरो ओपनर ट्रॅव्हिस हेड आसा. ताणें 22 सके मारल्यात. डॅथ आनी मदल्या ओव्हरींनी सगल्यांत चड सके मारपाचे वळेरेंत क्लासेन तिसरे आनी चवथे सुवातेर आसा. ह्या दोनूय सुवातांचेर खेळटना ताणें 15-15 सके मारल्यात.
अंदूंच्या हंगामांत लेगीत पंजाबाक चड जैतां जोडपाक जमूंक नासलें तरी ताच्या बॉलरांनी निमाण्या ओव्हरींनी बरें प्रदर्शन केलां. निमाण्या ओव्हरींनी ताच्या बॉलरांनी अजून मेरेन 39 विकेटी घेतल्यात. हाचें स्रय हर्षल पटेलाक वता. अर्शदीप सिंगान लेगीत बरी कामगिरी केल्या. दोगांयनी वळेरेन 16 आनी 9 विकेटी घेतल्यात. पावर प्लेंत मात तांकां खूब उणें येस मेळ्ळां. पावर प्लेंत तांणी फकत 15 विकेटी घेतल्यात.
दुसरे वटेन हैदराबादाचो फास्ट बॉलर भुवनेश्वर कुमार फॉर्मांत आसा. ताणें पावर प्लेंत अजून मेरेन 10 विकेटी घेतल्यात. फकत पावर प्लेचो विचार केलो जाल्यार सगल्या बॉलरां परस भुवनेश्वरान चड विकेटी घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
