भांगरभूंय | प्रतिनिधी
म्हापशें, प्रतिनिधी ः कांदोळेंतल्या ब्ल्यू बेल रिसॉर्ट चलोवपा खातीर ब्ल्यू बेल हॉस्पिटॅलिटी कंपनींत भागीदारी दिवपाच्या नांवान हरयाणांतल्या एका व्यक्तीची 35 लाखांची फटवणूक जाली. ह्या प्रकरणात कळंगूटे पुलिसांनी 6 जाणांचेर गुन्यांव नोंद केला.
ही फटवणूक एप्रिल 2023 ते ऑक्टोबर 2023 ह्या काळांत जाल्ली. कळंगूटे पुलिसांनी 17 एप्रिल 2024 दिसा भा.दं.सं.च्या कलम 420, 403, 406, 120 ब आनी 34 खाला गुन्यांव नोंद केला. स्वप्नील देसाय, अलझिरा देसाय, प्रियावर्धन जोशी, सचिन बगरिया, संगीता बगरिया आनी द्रुपद पटेल हांचो वयल्या गुन्यांवांत दुबावीत आरोपी म्हूण आस्पाव आसा.
वयर उल्लेख केल्ल्या काळांत दुबावितांनी कट रचून कागाळदार मनप्रीत सिंग हांका (फरीदाबाद, हरियाणा) ब्ल्यू बेल बीच रिसॉर्ट चलोवपा खातीर ब्लू बेल हॉस्पिटॅलिटी कंपनींत भागीदार करपाची ऑफर दुबावित स्वप्निल देसाय हाचे वरवीं दिली.
दुबावितांनी कागाळदाराक हे भागीदारी खातीर रक्कम गुंतवपाक लायली. कागाळदार सिंग हांणी वयल्या काळांत भागीदारी खात्यांत 35 लाख रुपया गुंतवणूक केली. ते उपरांत अप्रमाणिकपणा आनी फटवणूक करुन दुबावीत अलझिरा देसाय, सचिन बगरिया, संगीता बगरिया आनी द्रुपद पटेल हांणी स्वताच्या फायद्या खातीर ही रक्कम हस्तांतरीत करून भागीदारीच्या नांवांन 35 लाख रुपयांची रक्कम गैरवापर करून कागाळदाराची फटवणूक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
