हरियाणांत चलते बशीक उजो लागून णव जाणांक मरण, 24 जाण जखमी
भांगरभूंय | प्रतिनिधी
हरियाणा, खबरां संस्था ः हरियाणाच्या नुह जिल्ह्यांत प्रवाशांनी भरिल्ले चलते बशीक उजो लागिल्ल्यान णव जाणांक लासून मरण आयलें. जाल्यार 24 जाण जखमी जाल्ल्यात. मेळिल्ले म्हायती प्रमाण अपघाताच्या वेळार बशींतल्यान वट्ट 64 लोक प्रवास करताले. सगले मथुरा- वृंदावनाक भेट दिवन परत येताले तेन्ना हो अपघात जालो.
नुह जिल्ह्यांतल्या तवाडू उपविभागाचे शिमे वयल्यान वचपी कुंडली मानेसर पलवल एक्सप्रेस मार्गाचेर हो अपघात जालो. 17-18 मेच्या मध्यान रातीं सुमार 1:30 वरांचेर बशींत अचकीत उजो लागलो.
मेळिल्ले म्हायती प्रमाण बशींतल्यान प्रवास करपी सगले लोक पंजाबांतल्या लुधियाना, होशियारपूर आनी चंडीगड शारांतले आशिल्ले. ते मथुरा आनी वृंदावनाक भेट दिवन परत येताले. बशींतल्यान प्रवास करपी सरोज पुंज आनी पूनम हांणी पर्यटन बस भाड्यान घेवन आमी दर्शना खातीर गेल्ल्याची म्हायती दिली.
मजगजीं, मजती खातीर सुवातेर पावपी थंयसरल्या कांय लोकांनी सांगलें, रातच्या वेळार अचकीत चलते बशींक उजो लागिल्ल्याचे दिसले. आमी बोवाळ करून बस थांबवपाचो यत्न केलो पूण ती थांबली ना. ते उपरांत एका तरणाट्यान स्कुटरीन बशीचो फाटलाव केलो आनी ड्रायव्हराक उज्याची म्हायती दिली. पूण बस थांबता म्हणसर उजो व्हड प्रमाणांत पातळिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
