भांगरभूंय | प्रतिनिधी
पणजी, बातमीदारः हॅम रेडिओ वरवीं विज्ञान आनी तंत्रगिन्यान आश्वासक कार्यशाळेचो फायदो पणजेंतल्या तंत्रज्ञान मोगी, शालेय आनी महाविद्यालयातल्या विद्यार्थ्यांक जातलो. ही कार्यावळ आयतारा 2 जून दिसा पणजेच्या जांबुल कॅफेंत जातली.
आयोजकांच्या म्हणण्या प्रमाण, तंत्रगिन्यानाच्या मोगींक हॅम रेडिओच्यो मुळाव्यो गजाली आनी संचारण प्रणालींत ताची भुमिका, रेडिओ फ्रिक्वेन्सी, रेडिओ तरंगांचें संचालन ते लायव्ह प्रक्षेपण प्रदर्शन पळोवप तशेंच प्रत्यक्ष रेडिओ उपकरणां हाताळप, रेडिओ उपकरणांचो अणभव हांची म्हायती तंत्रज्ञान मोगींक कार्यशाळेंत घेवपाक मेळटली अशी म्हायती आयोजकांनी दिल्या.
12 वर्सां वयल्या पिरायेच्या भारतीय नागरिकाक हौशी स्टेशन ऑपरेटराचो परवानो परिक्षा पास करून परवानाधारक हॅम रेडिओ ऑपरेटर जावंक शकता अशें आयोजक बाबुल गोगोई हांणी सांगलें. एसटीईएम (विज्ञान, तंत्रज्ञान, अभियांत्रिकी आनी गणित) शिक्षणांत वांटो घेवपाक प्रोत्साहन दितनाच हौशी रेडिओची क्षमता आनी फायद्या विशीं शिक्षण आनी प्रेरणा विद्यार्थ्यांक दितले अशेंय तांणी सांगलें.
विद्यार्थ्यांक हौशी रेडिओची वळख करून दिवप आनी वेव्हारीक उपेगा वरवीं वैज्ञानिक संशोधनाची तांचे मदीं आवड निर्माण करप हो ह्या कार्यशाळेचो मुखेल हेत आसतलो अशें गोगोई हांणी सांगलें.
इत्सुकांनी पणजेंतल्या जांबुल कॅफे कडेन संपर्क सादचो वा www.jambulgoa.com हे वेबसायटीक वा [email protected]. ह्या ईमेलाक भेट दिवची, अशें आयोजकांनी कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
