विद्यार्थ्यां कडल्यान अतिरिक्त शुल्क घेतिल्ल्यान मुश्टीफंड विद्यालयाक नोटीस

भांगरभूंय | प्रतिनिधी

सात दिसां भितर जाप दिवपाचे शिक्षण खात्याचे निर्देश

पणजी, बातमीदार ः कुजिरा- बांबोळेच्या मुश्टीफंड विद्यालयाक शिक्षण खात्यान ‘कारणा दाखय’ नोटीस जारी केल्या. विद्यार्थ्यां कडल्यान अतिरिक्त शुल्क घेवपा संबंदी मेळिल्ले कागाळीक सात दिसां भितर जाप दिवपाचो निर्देश खात्यान विद्यालयाक दिला. वकील साव्हियो ब्रागांझा हांणी हें विशीं कागाळ शिक्षण खात्यांत दिल्ली. चार दिसां आदीं मुख्यमंत्री डॉ. प्रमोद सावंत हांणी अतिरिक्त शुल्क घेवपा शाळां आड लेखी कागाळी आयल्यार खर कारवाय करपाची शिटकावणी पयरुच दिल्ली. ते उपरांत पयली नोटीस मुश्टीफंड विद्यालयाक जारी जाल्या.
मुश्टीफंड विद्यालय अतिरिक्त शुल्क घेता अशी कागाळ ब्रागांझा हांणी 28 मार्च 2024 दिसा केल्ली. ते प्रमाण खात्यान 25 एप्रिल दिसा मुश्टीफंड विद्यालयाक हें विशीं जाप विचारुन आपली बाजू सादर करपाचो आदेश दिल्लो. विद्यालयान 6 मे 2024 दिसा खात्याक जाप दिली. तांतूत विद्यार्थ्यां कडल्यान 3,950 रुपया चड पीटीए खातीर आनी 500 रुपया शुल्क घेतात अशें कळ्ळे.
‘शिक्षण हक्क कायदो 2009’ तशेंच ‘गोवा शिक्षण कायदो 1984’ प्रमाण शिक्षण संचालकान आदेश दिले बगर अनुदानित शाळांक कसलेच अतिरिक्त शुल्क घेवंक मेळना. शिक्षण खात्यान कसलेच अतिरिक्त शुल्क घेवपाचो आदेश जारी करूंक ना. हाका लागून मुश्टीफंड विद्यालयाचे वेवस्थापन समितीक अतिरिक्त शुल्क घेवपा खातीर कारण दाखोवपाची नोटीस जारी केल्या. हे नोटीसीक सात दिसां भितर लेखी जाप दिवप गरजेचें आसा.
आमचे कडेन अजून एका शाळे संबंदी कागाळ आयल्या. आमी शाळेक आपली बाजू सादर करपाक सांगलां. पूण अजून तांणी ताका जाप दिवंक ना. वेळार जाप मेळ्ळी ना जाल्यार आमकां चवकशी करची पडटली. हाचे उपरांत त्या शाळेकय नोटीस जारी करची काय ना हाचेर विचार जातलो अशें शिक्षण संचालक शैलेश झिंगडे हांणी सांगलां.