भांगरभूंय | प्रतिनिधी
लखनौ सुपर जायण्ट्सान अंदूंचे इंडीयन प्रिमीयर लिगेच्या (आयपीएल) हंगामाची अखेर जैतान केली. हांगाच्या वानखेडे स्टेडियमाचेर जाल्ले मॅचींत ताणें येजमान मुंबय इंडियन्साक 18 धांवड्यांनी हारयलो.
लखनौ सुपर जायण्ट्सान दिल्ले 215 धांवड्यांचे मोखीचो फाटलाव करतना मुंबय इंडियन्सान निर्धारीत 20 ओव्हरींनी 6 विकेटी व्हगडावन 196 धांवड्यो केल्यो.
मुंबय इंडियन्स गुणतकट्यांत तळाकूच उरलो. रोहीत शर्मान सगल्यांत चड 68 धांवड्यो केल्यो. नमन धीरान नाबाद 62 धांवड्यांचें योगदान दिलें.
ते आदीं लखनौ सुपर जायण्ट्साची सुरवात बरी जावंक नाशिल्ली. 69 धांवड्यांचेर ताच्यो 3 विकेटी पडिल्ल्यो. पूण, मुखेल लोकेश राहुल आनी निकोलस पुरन हांणी शेंकड्याची भागिदारी करून व्हड धांवसंख्या उबारून दिली. पुरन बाद जाल्या उपरांत मुंबय इंडियन्सान सेगीत तीन विकेटी घेतल्यो. हातूंत राहुलाची लेगीत विकेट आशिल्ली.
हार्दीक पांड्यान टॉस जिखून पयलीं बॉलींग करपाचो निर्णय घेतलो आनी ताचो निर्णय नुवान तुषारान योग्य लेगीत थारायलो. ताणें पयलेच ओव्हरींत लखनौक धपको दिलो. देवदत्त पडिक्कल शुन्याचेर बाद जालो. संद मेळिल्ल्या अर्जुन तेंडुलकरान दुसरे ओव्हरींत मार्कस स्टॉयनीसा आड बरी आक्रमकताय दाखयली. पूण, ते उपरांत लखनौच्या बॅट्समनांनी मुंबयच्या हेर बॉलरांची बॉलींग फोडून काडली. सवे ओव्हरींत पियुष चावलान मुंबयक विकेट मेळोवन दिली. ताणें स्टॉयनीसाक एलबीडब्ल्यू बाद केलो. स्टॉयनीसान 22 बॉलांनी पांच चवक्यांचे मजतीन 28 धांवड्यो केल्यो. पियुषाचे तेच ओव्हरींत राहुलान दोन सके मारले. धावे ओव्हरींत चावलान परतून एकदा आपले स्पिन बॉलिंगेच्या जाळांत दीपक हुडाक (11) फटयलो. नेहाल वढेरान जबरदस्त कॅच धरली. लखनौन 10 ओव्हरींनी 3 विकेटी व्हगडावन 69 धांवड्यो केल्ल्यो.
राहुल आनी पुरन हांणी डाव सांबाळटना 22 बॉलांनी अर्द शेंकड्याची भागिदारी केली. निकोलस पुरनान 13वे ओव्हरींत 22 धांवड्यो करून मुंबय इंडियन्साक बॅकफुटाचेर धुकल्लो. राहुलाच्यो 28 धांवड्यो आशिल्ल्यो, त्या वेळार पुरन 7 धांवड्यांचेर खेळटालो. पूण, ते उपरांत ताणें जलद रितीन धांवड्यो करून राहुलाक फाटीं घालो.
अर्जुन 15वे ओव्हरींत परतून बॉलींग घालपाक आयलो आनी पुरनान तीन सके मारून 19 बॉलांनी अर्द शेंकडो पुर्ण केलो. अर्जुनाच्या पांयाक क्रॅम्प आयिल्ल्यान ताका मैदाना भायर वचचें पडलें आनी ताची ओव्हर नमन धीरान पुर्ण केली. ते ओव्हरींत 29 धांवड्यो आयल्यो आनी अशे तरेन लखनौन 15 ओव्हरींनी 3 बाद 159 मेरेन मजल मारली.
राहुलान 37 बॉलांनी अर्द शेंकडो पुर्ण केलो तशेंच पुरना वांगडा 38 बॉलांनी शेंकड्याची भागिदारी केली. आक्रमक बॅटींग करपी पुरनाक 17वे ओव्हरींत तुषारान बाद केलो. ताणें 29 बॉलांनी पांच चवके आनी आठ सक्यांचे मजतीन 75 धांवड्यो केल्यो आनी राहुला वांगडा मेळून 44 बॉलांनी 109 धांवड्यांची भागिदारी केली.
फुडल्या बॉलाचेर अर्शद खान (0) बाद जालो आनी 18वे ओव्हरींत राहुल स्विप मारपाच्या यत्नांत चावलाच्या बॉलाचेर बाद जालो. राहुलान 41 बॉलांनी तीन चवके आनी तीन सक्यांचे मजतीन 55 धांवड्यो केल्यो. हे विकेटी सयत मुंबय इंडियन्सान हॅट्रीक पुर्ण केली.
कृणाल पांड्या (12) आनी आयुष बदोनी (22) हांणी अखेरच्या ओव्हरींनी बरी बॅटींग करून पंगडाक 6 बाद 214 धांवड्यां मेरेन पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
