भांगरभूंय | प्रतिनिधी
पणजी, बातमीदार ः पावसाच्या आदीं धोक्याची झाडां कापपा खातीर पणजी नगरपालिकेक 1 लाख आनी ‘ब’ वर्गाच्या नगरपालिकांक 50 हजार रुपया. जाल्यार ‘क’ वर्गांतल्या नगरपालिकांक आनी सगल्या पंचायतींक 25 हजार रुपयांचो निधी मेळटलो. हे संबंदी राज्य आपत्ती निवारण प्राधिकरणान दोनूय जिल्होधिकाऱ्यांक सुचोवणी दिल्या.
प्राधिकरणान जारी केल्ल्या आदेशांत पावसा पयलींची तयारी करपा खातीर राज्यांतल्या वेगवेगळ्या वाठारांनी मनशाच्या जिवीक धोको निर्माण करपी झाडां कापप गरजेचें आसा. हे खातीर दोनूय जिल्होधिकाऱ्यांनी राज्य आपत्ती निधींतल्यान नगरपालिका, पालिका आनी पंचायतींक वयर उल्लेख केल्लो निधी दिवचो.
निधी दिवचे पयलीं पालिका म्हामंडळ आनी पंचायती कडल्यान आदीं दिल्ल्या निधीचें वापर प्रमाणपत्र घेवप गरजेचें आसा. लोकसभा वेंचणुक आचारसंहितेचे फाटभुंयेर कोणूच हो निधी राजकी फायद्या खातीर वापरचो ना हाचीय जतनाय घेवची. हे अधिसुचोवणे खातीर राज्य कार्यकारी समितीची तशेंच मुखेल वेंचणूक अधिकारी कार्यालयाची पूर्व मान्यताय घेतल्या अशें आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
